vo Raubvögel und Kunstusstellige

Ziit lauft und lauft. Die Wuche sehr entspannend und ned mega ereignisrich.
Mer schaffed jetzt scho set 8 Täg ohni Freitag und dur das hämmer halt nie Ziit gha gross um dHüser zieh. Und glich hämmer chli Sache gseh und vorallem aber au vel greläxt und nüt gmacht die letzte paar Täg.
Letzt Wuchenend esch do en Margaret River es Wiifestival gsi. Um Margaret River hets ca 120 Wiiberge. Grossi, chlini, gueti und halt au schlechti. A dem Wuchenend esch uf jede Fall Party gsi in Town. Am Donnstignomittag hets agfange. Mer send uf die foifi go es Wii-Fass-Rönne go luege. Dete send lustigerwiis kei Privatpersone sondern Wiiberge und Restis gägenand atrette. Leider isch dStrecki ned eso spektakulär gsi und dorum hets leider kei grobi Störz oder such lässi Sache gäh. Aber glich esches no glatt gsi. Nochhär hets öberall chli Marktständ gha und ede Pubs hets Band gha wo gspelt händ. Das esch eigentlech sochli seinzige gsi, womer wörkli vom Festival metöbercho händ. Am Sunntig hets denn en grosse Degustationsevent gäh. Dete semmer denn aber ned gange.
Gschaffed hämmer die Wuche weder am Schopf. Naja mech het das ned esoo motiviert, well mer händ no uf zwoi Siite chli en Understand gmacht.. Grundsätzlech wär das jo scho interessant, aber dur das, dass alles met schwäre Balke gsi esch, esches halt meh Buebearbet gsi. Ich ha die letzte vier Täg vorallem Werkzüg brocht, ha Leiter festghebt oder Distanze gmässe. Aber am Michi hets emu gfalle, das esch jo au super! Einisch semmer nomol en Tag ufs Boot und händ dete sDeck gstreche. De Michi und ich händ aber eigentlech nur müesse sDeck zerst putze, denn alles abchläbe und no sZmettag mache und denn het eus de Jim as Festland brocht und mer händ nochli gsönneled, badet (woni serste mol chlini Qualle gseh ha) und Möscheli gsammled, woni chli aagfange ha zbändele, obwohl, Möschli bore esch gar ned eso eifach, wenn also öber en guete Trick kennt, wäri sehr dankbar =).
Vorgester semmer no en Raubvogelpark wos do em Ort het. Mer send dete chli ade Chäfig verbii gspaziert und händ die zum Teil wörkli resige Tier bestund. De Vogel do ufem Beldli zum Biispiel, leider wössemer nöm wienier heisst, werd bes zumene Meter gross (stehend) und het en Flögelspannig vo ca 2.50m. Mer händ eus natürlich dShow wos no gäh het ned entgo loh. Es esch wörkli herrlech gsi. Ned mega öberwältigend, aber de wosi gleitet het, esch wörkli e Nummere gsi =). Er esch metem Falk ufem Arm id Arena cho und het vel Verschednigs öber die Falke (wo do in Australie iheimisch send, aber halt glich emmer weder gschosse wärde, und so nöm so vel get wie au scho) verzellt. Denn het jede wo het welle indöfe go de Falk ufde Arm zneh. Mer händ das denn aber ned gmacht, well wörkli so vel agsande send und de Falk merklich nervös worde esch met de Ziit und mer sganze ned no meh ed längi händ welle zieh. Aber ebe, de liebi Herr met de schöne Scheitelfrisur esch mega underhaltsam gsi. De Michi und ich händ eus sehr oft eifach müese zämeneh. Esch no schwerig zum erchläre, wiener gsi esch... Velech treffts am beste, wemmer sech en englische Adelige vorstellt, wo sehr ghobe red (er het fast jede Satz met „Ladies and Gentlemen“ agfange) aber glich hi und do es chlises Scherzli macht und sochli reserviert, belustigend selber vor sech heschmunzled. Einisch, woner eine gmacht het und niemer glached het, hetter so zur Uflösig, dasses ebe en Wetz gsi esch ganz belustigend gsei: „Well, of course, this was a joke“. Er esch wörkli sehr läss gsi. Scho fasch klassisch. Ah jo öbrigens de chli Bueb ufem Beldli esch sehr härzig gis. De Falk händ dLüt emmer ufeme ganz gstrecke Arm müesse hebe, und dem Bueb escher eigentlech vel zschwär gsi. Das heisst, de Arm esch de emmer wiiter abe gange, bes de Falk sech denn freiwillig vo sim Arm verabschedet het und zugg zum Herrchen gfloge esch. Nochhär hets den no en lässigi Raubtierfüetterig gäh. Uf jede Fall guete Usflug gsi.
Gester semmer denn metem Rod ene Gallerie ane Kunstusstellig. Nur scho dGallerie esch sehr läss gsi. So emene Asiatische Stil. Es het drü Pavillons gha, zmetzt ene en schön agleite Brunne und rundume vel Platz met schöne, alte Boim, schöne Underständ, womer secher super cha Opening-parties fiire. D'Belde vo usgstellt gsi send, send die meiste mega gsi. Sie händ zur Ziit grad Belder grad vo vier Könstler usgstellt gha. Eine devo esch anschinend sehr berüehmt, uf jede Fall muener das sii, well dBelder send wörkli ned schön gsi. I be secher ede Mettelstufe wördeder alli Chend öbe sgliche mole, aber dPriise send glich ganz Stolz gsi. Ebe de Name zahlt mer halt. Denn hets no en iiheimische Könstler gha. Er het ganz schön gmoled, wenn jetzt au ned mega gigantisch. Aber die andere zwoi, wow... De einti het ganz breiti aber ned eso höchi Belder gmoled. Smotiv esch eigentlech emmer sMeer gsi met em Hendergrund en Insle, aber wörkli sehr schön und detailiert gmoled. Wär mega vör es grosses Wohnzemmer (leider hämmer snötige Chligäld grad ned debii gah =)). Und de zwoit Könstler Andrew Tischler (wär evt wert zum google) esch wörkli gigantisch gsi. Belder eso detailiert, dasses wörkli chöne Fotene sii. Faszinierend esch, wie wunderschön er sSunneliecht moled. Sbeld läbt so rechtig. Shärz werd eim echt warm, wemmer das aluegt! Und sehr erstundlech esch be em au, dasser erst 26gi esch. Also sehr en junge und wörkli begobte Könstler.
Am Friitigobe hämmer denn no en Schopferöffnigs und Verabschedigsparty, aso jo eifach en BBQ. De Jim got denn los met de Jacht und reist en Norde. Au mer wärde nochhär weder wiiter zieh. Mer freue eus fest. Grad mer zucked dFüess scho langsam weder. Sie send jetzt gnueg lang am gliche Ort gsi. Obwohl es esch do wörkli sehr schön.

Au em Camper =)