im Oste sehr vel Neus

Em gägesatz zum letzte Blogitrag werdi höt müeh ha, öberhaupt met zverzelle einisch ufzhöre =) mer händ ede letzte erst einehalb Wuchene soooo vel erläbt, dassmi uf ei Art mega freut, euch chli defo zbrechte uf die ander Siite werds secher schwerig euch alles so metzteile, dasser beldlech meterläbed was mer erläbt händ.

Wie bereits erwähnt hämmers nördliche Westaustralie Abentür am Ziistig vorere Wuche gstarted. Mer send den am erste Tag grad wie planed zu de Pinnacles gfahre. Erwartet hämmer, oder secher ich, en Sandwüesti wos so en Handvoll grossi Stei denne het, wo useraged. Es esch aber rächt andersch gsi. Es esch en resigi Flächi vo chlinere bes grösseri verchalchti Baumstämm gsi, wosech vor Millione vo Johre (=)) bildet händ. Es esch lässig gsi, wells wörkli ganz ganz vel gsi send.

Wiiter semmer denn uf Geralton, so de letzti görsseri Ort vorem wörkleche Norde (Broome). Er esch zwor ned wörkli mega en schöne Ort gsi, doch es esch eus grote worde, dete no einisch so rechtig go poste, well nochhär sZässe absolut übertürt esch. So semmer eus denn fliisig met Teigware, fertig Saucene, Quicksuppene, Pancakepulver, UHT Milch und so wiiter go usstatte. Do Geralton berüehmt esch för de Lobsterfang, semmer au no en Füehrig go gnüsse enere Lobsterfabrik wos dLobster lebändig noch Asie verschecke. Sie düend sie be ca 7° chaltem Wasser ischlöfe und so schlofend verschefe. Zasie werdes denn grad em Restaurant weder e wärmers Wasser gleit, wos verwached und denn bede Gäst grad lebändig döfe usgwählt werde. Vel vel meh hämmer leider ned verstande =). Aber es esch no lusig gsi, vorallem well mer metem thailändische Päärli wiit us die Jöngste gsi send. Anschiinend gotmer so öbis erst go aluege wemmer pensioniert esch =).

Denn semmer ab es Outback vom Norde. Rächt krass esch wörkli, dass sech dLandschaft sett Perth eigentlech nöm verändered het und sech bes zum Karijini NP (östlech vo Exmouth, för die wo de Blog amigs metem Atlas zäme läsed =)) au ned het verändered. Es send eifach resigi Wiitine, met so chneuhöchem Gestrüpp, und das wars. Au sWasser, wos em Süde vo Perth in Hülle und Fülle gha het esch weder es wertvolls Guet worde.

Vo Geralton semmer denn en Kalbarri NP gfahre. Underwägs hämmer aber no bemene chline Gheimtipp halt gmacht: em Hutt River Province Principality. Em Reisefüehrer stoht folgendes: „Zur Gründung des zweitgrössten Landes Australiens kam es am 21.4.1970, als sich der Farmer Len Casley über die Quoten der Regierung zur Weizenproduktion empörte und sich mit Hilfe einer Gesetzerslücke (die eilig gesschlossen wurde) vom Commonwealth of Australia abspaltete. Trotz grösster Anstrengungen seitens der westaustralischen Regierung, diese Abspaltung gültig zu annullieren, sind auch nach mehr als 30 Jahren His and Her Royal Hightness Prinz Leonard und Prinzessin Shirley die Herrscher des einzigen Fürsentum der Welt, das ohne Blutvergiessen ausgerufen wurde.“ SAwese esch eigentlech wörkli nur en Burehof, aber meteme Staatsbüro, enere Post, enere Chele und eme Souvenirshop. Sie händ aber also eiges Gäld (mer händ es Set Nötli kauft, womer wemmer deheim send gärn döf cho go bestuhnt wärde (es het also keis Wasserzeiche) , und sie händ es eiges Postsystem, dMArke müends aber uf dRücksiite vom Couvert chläbe, well susch die Australisch Post schwerig duet, send ned Chranke- und Altersvorsorgversechered, müend aber au kei Stüre zahle. Mer cha sech do sogar ibörgere loh, aber do hämmer eus denn us chostegrönd degäge entschede =). Wamer aber natürlech öbercho händ, esch en Stämpfel e euse Pass met Iireis- und Usreisdatum. Öbrigens, womer bem Awäse achosend und grad händ en Souvenirshop go luege, esch dRoyal Highness Prinz Leonard eus entgägecho und het eus en persönlechi Füehrig möglech gmacht. Er esch öbe 80i und het andersch schnell grad und gnuschled, so hämer eigentlech ned eso vel verstande. Aber do em sis Land teilwiis uf de Wält offiziell anerchant esch, hetter zum Biispiel vo China es offiziells Regierigsgschänk öbercho und au de Papst het em en Brief gschrebe (oder ergendso =)). Die ganz Sach esch wörkli sehr sehr lustig gsi. Mer weiss wörkli ned rächt, eb er eifach chli en alte Spenner esch, oder eifach chli uf dem Erfolg woner gäge dRegierig doch devotreit hät usruebt und sech öber dSituation sälber lustig macht.
Uf jedefall esches super gsi und mer send vo dete zum Kalbarri NP gfahre, womer leider de aber zwoi anschiinend wunderschöni Wanderige ned händ chöne mache, wells fliisig grägnet het und das ned nur schüch.

Mer send denn zumene andere „Höhepunkt“ vo Westaustralie gfahre, Monkey Mia. Es Strandparadis, wo jede Morge weldi Delphine an Strand chömed und dete zur belohnig bezli gfüettered werde. Grundsätzlech esches scho läss gsi (ich ha sogar eim vo de Delfine döfe en Fesch gäh, was nur en chline Teil vo de Umstehende händ döfe), aber ebs wörkli esoo wahnsiinig esch, dassmer deför 150km (ein Wäg) vom sech nemmt (wörkli sehr vel Lüt mached das), ich weiss den ned. Mer send aber vor Monkey Mia no enen Ocean Park, wos ganz vel iheimischi Fesch, Tintefisch und sogar Haie gha het. Dfüehrig esch sehr interessant gsi und so esch das eigentlech de grösser Höhepunkt för eus worde.
Denn semmer wiiter noch Canarvon gfahre. Canarvon esch berüehmt för dBanane, Passionsfrucht, Mango und Orangeplantagene. Es esch wörkli sehr läss gsi, amene grosse Fluss (wo aber scho weder troch gsi esch (Rägeziit do em Norde vo Australie esch vo Nov-März) hets links und recht nüt als ebe halt Plantagene. Mer händ do auno ghofft, de Francois, dAmandine und dEmma womer bede Olivefarm kenneglernt händ ztreffe, aber mer händ eus ned troffe, sie send bereits en Exmouth gsi. So hämmer eus denn au detehe ufgmacht. Aber zerst Exmouth liit ufere Landzunge ade östliche Siite. Die westlech Siite esch NP met eme gwaltige Reef, anschiinend schöner als sGreat Barrier Reef. Leider hämmer nur Toure gfunde, wommer so drü Stund usefahrt und dete cha go schnorchle. Do die aber emmer rächt tür gsi send und vorallem för de Michi so sehr unattraktiv, hämmer eus den de entgäge entschede. Prompt hämmer natürlech womer scho wäg gfahre send, vonere stöndige Tour met Glassbodeboot erfahre. Jonu, mer hoffed, dassmer denn em Great Barriert Reef so öbis chöne mache. Mer händ eusi Frönde denn öbrigends no en Exmouth troffe und do sie de NP grad verloh händ, hani vo ene döfe e Schnorchelbrölle uslehne und so hani glich chli chöne go schnorchle und ha ned ganz müesse druf verzechte. Mer send denn för zwoi Täg e NP, händ vorwiegend schöne Wasser met de Stränd gnosse und ich be de ebe am zwoite Tag nochli go schnorchle. Es esch grundsätzlech sehr es umwärfends Erläbnis gsi. Mer händ ghört, dass de einti Strand bsunders guet sell sie. Es esch en Steistrand gsi, dass heisst, es esch wörkli läss gsi, welli so scho nur es paar Meter vom Strand ewäg chli Choralene gseh ha (worschiinli för vernarrti Taucher ned meega, aber echt beiidruckend för mech). Siine und usego vom Wasser esch deför ned eso eifach gsi, ha rächt verschlagni Bei gha. Es esch rächt schlächt Wetter gsi und dur das hets rächt Welle gha (sgrosse Reef esch es paar km wiiter use und brecht dete de grösst Teil vo de Wellene, aber be schlächt Wetter esch halt sMeer glich au ned ruhig). So hetsmi grad bem usem Wasser cho emmer andersch a dStei ufegrüehrt. Rächt muesam, vorallem, weli beidi mol vel Salz em Mul, Nase, Auge und sogar Ohre gha ha (au schnorchle sell glernt sii) und dorum scho ned mega gluned gsi be. Aber sschnorchle esch wörkli faszinierend gsi. Krass esch gsi, dassmer de Chopf het chöne under Wasser hebe und en noii Welt het sech ufdo under eim. Die einte wössed secher, dassi wörkli ned grad Frönd be met Fesch und dorum esches au en rächt unheimlechi Erfahrig gsi. Mer wärs secher lieber gsi, weni no es Gspöndli debi gha het. Aber es esch glich voll läss gsi, wievel farbigi, durchsechtigi, grossi, chlini, chli langwiligi und voll exotischi Fesch dasses scho nur uf dem chline Stöckli woni gschnorchled ben gha het. I be fest froh, dassi das ha döfe erläbe, obwohl, Fesch semmer hendere Schiibe emmer no lieber.

Wiiter hämmer eus zum Karijini NP ufgmacht. Entlech het sech dLandschaft chli verändered, es het einigi Högelzüg gha wo wörkli sehr schön gsi send. Grad vorem NP semmer denn weder uf eusi Frönde gstosse, wo met zwoi andere Autos (em ganze znünte) underwägs send. Sponti hämmer eus för zwoi Täg ene aghänkt und send met ene en Park. Am erste Tag semmer uf de Mt. Bruce, am Iigang vom NP regelrächt ufegsprunge. Au bede folgende Wanderige hets för euse Gschmack zwenig Ziit gäh, zum dNatur gnüsse, sondern es esch meh chli drum gange, dassmer möglechst vel cha go mache und wandere. Aber es esch glich en schöni Wanderig gsi, het guet do, wederemol chli öbsi körperlech zmache. Mer händ den ufeme Camping em Park öbernachtet und händ de Obig met so velne Lüt wörkli gnosse. Am nöchste Tag hämmer denn agfange dSchluchtene, wo de Nationalpark berüehmt esch deför go abchlabbere. Es send wörkli sehr schöni Wanderige gsi. Gwaltig, wie schön dStei, sWasser und au sGrüen zäme es Paradies ergänd. Schwerig zum wörklech en Wort zfasse. Am Obig hämmer eus denn weder vo ene abkappled. Do sie no einisch en Tag bede gliche Schluchte händ welle verbrenge und au no die andere Wanderwäge abzlaufe, womer ned händ möge mache, hämmer eus den entschede, dass mer eher no zu de andere Schluchte gönd und sdenn aber gseh händ und wiiter reise. Au die Schluchte send wunderschön gsi, vorallem de einti Wäg, womer wörkli wie duren Urwald glofe esch und nochhär zumene mega schöne Pool cho esch. De relativ langi Stopp het sech drü mol glohnt!

Als nöchsts hämmer no Wiiternoom welle go aluege. Um Wiiternoom ume esch johrelang blaus Aspest abbout worde und womer denn usegfunde het, wie schädlech dasses esch, het dRegierig dBewohner vo Wiiternoom ufgfordered, sDorf verloh. Mer händ so dänkt, dassmer anen grossi Ruinestadt anechömed. Leider send aber nur no die bewohnte Hüser gstande (Wiiternoom het no 12 Bewohner). So het sech de Abstecher eigentlech au ned glohnt, aber das passiert jetzt halt =).

Jetzt semmer underwägs noch Broome. Mer werde dete es paar Täg si und under anderem euses Visum verlängere. Bes jetzt hets noni rächt klapped, so mümer wohl met de Botschaft kontakt ufneh, das goht den wohl es Momentli.

Mer händ wörkli ganz en riichi Ziit hender eus (wiener a de längi vom Blog secher erchened) und send fasziniert vo allem schöne und gwaltige womer händ dörfe Erläbe.

im Osten nichts Neues

Leider gets ned emol so vel interessants vo de letzte Wuche zverzelle.
Mer send emmerno fliisig am Olive pflöcke. Mer händ eigentlech wörkli nüt anders me gmacht. Mer händ dOliveart gwächsled. Mer händ die letzte paar Täg Olive handpflöckt womer eigentlech Oil macht, aber usnahmswiis au no ufbereited werde för Tischolive. Das esch eigentlech schochli die einzig Veränderig gsi =). Wa au rächt neu dezue cho esch, send Zeckeplog. Ich ha die letzt Wuche öbe 10 Bess gha. Die andere fast kei, so fiis, die gönd emmer gäg die Chliine =).
Währed de Freitäg semmer mol go minigölfle. Esch wörkli no lustig, do händs zmetzt em nüt en wunderschöni Minigolfalag. Dbahne send us Kunstrase gsi und mer händ also ned grad brilliert, aber es esch lustig gsi. Am nöchste Tag semmer wedermol go en Sevice met em Auto mache. Mer müend all 5000km eine mache, dass de Strosseservice eus chunt go hälfe und das esch rächt vel. Evt ned die best Entscheidig womer e dene 4.5 Mönet troffe händ, die Strossesservice-Versicherig. Jonu. De Michi het denn au grad sini Mähne no schniide loh und ich ha dänkt, i lohmer dFransle weder noche schniide. Aber das esch chli en Flopp gsi. 1. esches rächt tüür gsi und 2. esches wörkli sehr wüest =). Eifach ned eso schön gschnette und absolut kei öbergang zu de restliche Hoor. Velech mueni do no einisch Hand alege, obwohl, werd wohl ned wörkli better =).
Gester send die erste 3 Wwoofers vo eus sebe wiitergreist. Mer händs zäme wörkli sehr guet gha. Es esch emmer sehr lustig gsi und mer händ vel gred und bier trunke zäme (also scho ned vel vel, aber eifach regelmässig =)) Grad wörkli au de Michi hets sehr gnosse. Er esch rechtig ufblüeht. Hoffe es esch för en ned allzu langwilig nur met mer =). För me no lustig esch gsi, dass die andere es paar mol mech um Rot gfrogt händ, wie zum Biispiel: wie mueni Chäsmaccaroni mache? Wie brengi de Fleck us de Hose? Wieso das sie das mech gfrogt händ weissi halt au ned eso, aber i has amigs no lustig gfunde. Velech weli ghürote und dorum es Husmueti be.
Mer händ höt euse letzti wörklechi Arbetstag gha. Domer aber ned ganz eso schnell voracho send, wie erhofft, müemer morn no einisch churz use. Aber mindestens am Nomittag hämmer frei. Denn düemer wäsche, weder packe und losgots am Ziistig. Mer fahred eifach rechtig Norde mol los. Es get grundsätzlech rächt vel zgseh. Leider send alles rechtigi Touristeattraktione und mer hoffed, dass aber ned alles eso tüür und voll Lüt esch. Nur es paar 100km vo do hets en Wüesti met grosse Sandstei-Stei denne. Worschiinli fangemer met dem Kulturguet a =).

Olivepflöcke

So jetzt hämmer euch lang warte loh, sorry.
Die letzte zwoi Wuche send wörkli sehr schnell gfloge, obwohlmer ehrlechgseit wörkli vel Ziit gha hette zum eus mol mälde.
Nochem feine BBQ am Friitig vor zwoi Wuche semmer denn am Samstig wiiter rechtig Perth. Leider hämmer chli verpasst Föteli zmache, aber grundsätzlech esch Perth wörkli sehr en schöni Stadt. Do am Donnstig-Sunntig in Fremantle (en grosse Stadtteil südlech vo Perth) en grosse Märt esch, hämmer eus das natürlech ned entgoh loh und er esch wörkli läss gsi. Er esch secher ned ganz andersch als jede anderi Märt und glich esches amigs rächt faszinierend, wemmer all die fresche Fröcht und Gmües gseht und natürlech au die lustige andere Ständ wos amigs so het. Au ned verpasst hämmer en Fremantle sIn-Restaurant „little creature“. Uf empfällig semmer denn natürlech au dete he. Es esch wörkli sehr speziell, enere ehemolige Brauerei, doher sehr es lässigs Ambiente. Leider merktmer halt scho, dass au die uf Profit hoffed und doher werdmer scho fast weder usegrüert, wemmer dGable ableit. Aber velech esches vo eus au ned esoo klever gsi, am Sunntigmettag dete go ässe.
Die nöchste zwoi Täg hämmer en Perth verbrocht, mer händ glädelet, käfeled und gschländered. Es esch wohl die letzti wörkli grossi Stadt bessmer weder en Sydney send (so em September) und das got wörkli nochli. Doher hämmers schonomol usgebig gnosse. Mer händ vom DTV en grosse Batze öbercho und händ eus entschede, för das Geld enes schöns Hotel ei Nacht go schlofe. Mer händ em Miss Maud öbernachted, es Schwedisches Hotel zmetzt ede Stadt. Zude Nacht hämmer au no es Znacht und Zmorge Buffet gha. Mer händ wörkli zwoimol rechtig inegschlage und send noch dene zwoi Molziite buechstäblech umekugeled. Mer händ sehr gnosse.
Settem Mettwoch vorere Wuche semmer jetzt weder am Wwoofe. Mer wohned ufere Olive Farm, öbe 150km nördlech vo Perth. Und scho do esch total nüt meh. Mer müend min. 40km fahre zum nöchste Ort. Anschiinend esches vo jetzt a meistens so, de ganz Norde lang. Do uf de Farm gfallts eus eigentlech ned schlächt. Mer send zerst 3 Wwoofer gsi, sett gester semmer 7. Es esch e lustigi Mischig vo Natione und eigentlech hämmers wörkli guet zäme. Wohne düemer em Familiehuus vo de Bsetzeri. Aber do se no Chend hett, wo en Perth ed Schuel gönd, duet sie chli pändle. Sie wohnt vom Mi-Do und vom Sa-So do. Susch hämmer emmer Strumfrei =). Schaffe esch ned meega prikelnd. Mer händ bes jetzt vorallem abgläse. Das esch aber eigentlech no ganz lustig. Mer spannt es Netz um de Stamm vom Baum ume und cha de dFröcht eifach pflöcke und gheie loh. So gots no ganz rassig. So sorgfälltig düemer nume dTischolivene pflöcke. Doiloliven werde entweder met de Maschine gmacht, oder mer händ eso Vibrierstäb met Fenger dra, womer dOlive cha abeschöttle. So verschlots halt dOlive es bets, aber dos nochhär eh presst wärde esches jo eh glich. Dolive vomer Handpflöcke düemer denn amigs no wäsche und ussortiere (es wärde grundsätzlech nur die schöne und grosse wiiterverarbeitet), denn chömes för 12 Mönet ene 10% Salz-Wassermischig und chöne nochhär verpackt wärde. Was wörkli interessant isch do, esch dasmer vel öber Olive lerned. Okay, mer händ velech jo au beidi kei Ahnig gha. Zum biispiel hämmer glernt, dasses ned schwarzi und grüeni Olivearte get, sondern dass die grüene, wemmer sie ned gnueg früeh pflöckt eifach schwarz werde. Oder mer händ glernt, dass Olive, au wenns mega saftig und fein usgsänd am Baum, absolut undgnüsbar send, wemmersie ned ebe no behandled. Oder mer händ glernt, dasses ca 120 Olivearte get, mer aber nur ca 30 Arte duet apflanze. So ehr gsänd, mer lerned do en Australie au chli öbis =)- Gester und vorgester hämmer denn müesse Äst abschniide. Hei, das esch echt e büetz gsi. Ich ha noch zwoi Stund, scho en offeni Blotere gha (dassmer chönte Händsche alege, esch eus natürlech ersch nochhär en Senn cho) und wörkli, noch zwoiehalb täg het eus alles weh do. Höt hämmer frei und chöne eus so wörkli chli erhole. Ah jo, wenn dCatherine (esi Chefi) ned ume esch, esch de Darryl, oder de Okki euse Chef. De Darryl esch de Manager und de Okki esch en Japaner wo eifach scho sett zwoi Johr do schaffed. Lustig be em esch, dasser eigentlech wörkli super English red, nur en resige Akzent het. Er seit zum Biispiel „Glavel Load“ (Gravel Road=Chesstross). Susch escher eigentlech chli en armi Gstalt. Er kifft wienes Loch und betrenkt sech eigentlech jede Tag. Mer träffed wörkli rächt vel Lüt wie er en Australie und das esch rächt erschreckend. Mer wössed wörkli noni rächt a was dass das liit. Eigentlech esch do en Australie wörkli sehr vel unkomplizierter als be eus und es esch vel weniger Stress, aber glich send dLüt ergendwie ned resistent gnueg. Oder velech gets eifach au nüt susch zmache do und dorum esch das de einzig Wäg zum chli Abwächslig drii zbrenge. Mer händ do ufem Awese au en Quat. Und grad de Michi fend de natürlech super. Mer händ so ufere welde Fahrt no die schöne Känguruubei gfunde. Känguruss send sehr schreckhafti Tier. Dass heisst, wennsech eis eso em Haag verhädered, verhungereds ned umbedingt, cha sech aber au ned wörkli befreie, wells vor Schreck und unbeholfeheit en Kolaps het. Mer gseht dorum au vel „ganzi“ Kängurus am Strosserand. Die send evt nur ganz leicht agfahre worde, aber stärbe am Schock.
Ich höckle jetzt grad met ere Französin und ere Japanerin vorem Fernseh und gnüssed „Sweet Home Alabama“ und schwelge zäme ede Romantik. De Michi und en Franzos putzed grad dAutos und befestiged eusi neue (vo Hand gneite) Vorhäng eu eusem Auto. Jetzt hämmer fest montierdi und müendsie ned jedi Nacht met Chlämmerli amache. Esch schön emmer weder chli öbis am Auto zerneuere. Esch halt schochli euses deheime.
Am Michi sin Geburtstag esch guet verbii gange. Es het sogar Chueche gäh, es hetti selle en Öberraschig werde, aber das het denn ned eso rächt klapped. Aber ich glaube er het sech glich fest gfreut und das esch jo dHauptsach.
P.S. Mer wärde hi und do öber email gfrogt, wie eus denn als Paar got. Dankbar döfemer säge, dassmers wörkli sehr guet zäme händ. Mer gnüsses fest, Ziit ha zäme. Es esch es lässes Abenteur do und ich be so dankbar das metem Michi döfe zerläbe. Em sis Englisch esch öbrigens wörkli emmer besser. Er gnüssts mega, dassmer um so vel Backpacker send grad em Moment und red wörkli sehr vel met ene. Selbst en Swiizerdütsch wärs ungwöhnlech vel, aber das esch doch es Zeiche, dasser sech wohlfüehlt, und das esch super.