doch glich scho fast drue wuche do

gruezi metenand

so entli nemimer weder chli ziit zum en blog schriibe

mer send jetzt scho fast drue wuche do uf de kangaroo island, womer am afang doch daenkt haend, mer goend scho nochere wuche weder. aber mer haend eus choene ilaebe, haend vel gschaffed unds langsam gschafft, metem muesame chli choene umgo, und vom lob choene laebe. aber woerkli es het sech au einiges veraendered.

zerst no schnell zude Foetli, chli vo letzt Wuche eher...
dFaehre foer uf dKangaroo Island. Sie esch sehr unruhig gsi, eus esch aber gloecklecherwiis ned schlaecht worde =)

denn die schoeni Ussecht vo eusem Cottage, dKangaroos, wo um euses Cottage ume send

de chli haerzig little Floris (14 moenet) wo bem Pauls Place vo Hand ufzoge werd, und uuuu schnuesig esch =)

denn dSchlange wos dete haend, wo aber niemer gaern het, wellsi so agressiv esch, selbst de Paul hetsech wie en Imker ipackt, wonnersi schnell usegloh het zum Chaefig putzte. Sie esch aber sehr schoen und gross.


ich ha daenkt, i stelli euch mol en tag do vor:

mer schlofed emmer raecht lang, stoent denn uf und naemed zmorge und wartet, bes eus dKatja oder de Paul alueted. das esch meistens so um die 10ni, halbi 11i. sehr oft, muemer denn grad metem Huesli putze afange. das heisst foer mech, schnell go luege ebs Huesli scho leer esch und wievel Bett das brucht worde send. Denn gots weder zrugg es Buero und dErsatzwoesch werd packt, schnell kontrolliert, ebs no gnuegt Loempe, Reble und Waeschmettel het, denn machemer Wwoofer (em Moment semmer vier, dGerman Girls send gange, aber jetzt esch en duetsch Holger defoer do) eus vollpackt uf, de Dave putzt WC, de Michi macht Better und staubt ab, i mache Kuchi und denn luegemer au wer no duet Staubsuge, ufneh und es paar chlini Jobli erledige (de Holger hets nonie gmacht, dorum heter no kei feste Job =)). Wemmer bem putze fertig send fahremer met eusem Auto, oder loend eus vo ene abhole und goend zum Paul's Place. Dete esch a vier Taeg e Tour, dass heisst foer mech: Oats i vier verschedni Choeble foelle und a bestimmti Ort verteile, dassi de Paul grad cha neh underwaegs waerede Tour, denn gebi amene grossteil vode Tier Wasser, fuettere dMeersaeuli und dHoppingmice und helfe den em Paul nochli bede Tour (Luet dures Tor schleuse, ohni dass Tier duregoend, em Vogelchaefig dEchitnas presentiere und helfe met de Voegel, denn meteme Pony zum Schofschoere laufe und zrugg, denn chunt foer mech sOpossum zeige und sLaemmli fueter, werend de Paul sSchlange zeigt). dJungs mached e dere Ziit ganz vel verschedes anders: Haage, Motorsaegele, Chefig flecke, Rampe boue, und soo wiiter. Nocher oebe am drue haemmer amigs es Sandwich und schaffed wiiter. Ich muess amigs noem mega vel strengs mache, chli woesch oder usemeste. oder au vel speli met de 5 joehrige Tochter Poppy. was maengisch au streng isch =). gaege Obe dueni denn no Tier voni am Mettag draenkt ha fuettere und dass wars denn eigentlech meistens so zwoeschedem foifi und saechsi esch de Arbetstag verbi. Denn gets no es Bier, mer packed chli Zaesse, womer no bruched und goend weder ed Huesli ufe. Dete duemer zaeme choche, spele, plaudere, filmluege oder au jede foer sech chli laese.

Mer haend eus woerkli sehr guet choene a das gwoehne und es gfallt eus eigenltech sehr guet. Grad ich gnuesse, dassi sehr vel saelber cha mache, halt grad dorum wels emmer chli sgliche esch =).

Gester haemmer eusi ersti Tag frei gha (susch hetses scho oebe zwoi mol gaeh, dassmer eifach nur Huesli putzt haend und am Nomittag noem haend muesse schaffe). de Michi und ich send chli ade Nordkueste noche, haend en Muschlestrand bsuecht, womer raecht het meusse drinabestige und spoeter denn au weder ufe. Zudem hettmer am Meer noche um Landzungene muesse umelaufe, raecht laess =). Denn semmer anen schoene Ussechtspunkt, womer schoen het choene oeber Koeste luege und denn wiiter no zumene Luechtturm. Mer send no bes am Sunntigmettag do. Denn naemer eus nochli Ziit zum um dInsle umefahre und goend wiiter ufs Festland und mached eus denn rechtig Perth uf, obwohlmer no es ziitli ned det werde acho (emu so plant esches sicher =)).

Mer danked euch ganz herzlich foer euchi Understoetzig und euches a eus daenke. Mer haend woerkli maengisch chli muesse was abeschlucke, aber es het sech glohnt.

Mer freue eus jetzt aber au weder ufs wiiterzieh und neus zgseh.

nur ganz churz

leider haemmer be dere Familie do ned eso raechte Internetaschluss (aso es het scho, aber i glaube sie waend eifach ned, dassmer de lang bruched) und so machemer hoet nur ganz en churze Itrag, leider au ohni Foeteli, eifach dass er weder chli oebis vo eus ghoered.

Mer send metlerwile uf de Kangaroo Island und gnuessed de schoeni Flaecke Erde. Mer wohned do i eim vo 7 woerkli sehr schone Feriehuesli chli oberhalb ade Kueste met wunder schoenem Usbleck. Gaege nobe werdemer rechti met Kangaerus oeberfluetet. Sie grased rund um dHuesli ume und send gar noem so schuech.

Schaffe duemer do emene chline Zoo (Wildlife park). DFamilie het set 3.5 Moenet zwoi German Girls wo do am wwoofe send. Leider got das chli uf eusi Choeste. Dur das send sie natuerlech routiniert und woessed was muend mache, eus werd dur das eigentlech nuet woerkli erchlaert. Mer muend alles erfroge und ergendwie fuehlemer eus sochli unerwoenscht... dezue chunt, dass de Pa vo de Familie (mer schaffed vorallem met em) maengisch chli Mueh het met zfrede sii. Er fend emmer ergendoebis chlises wo schlaecht esch und bored denn uf dem ume.

Hoet esch sehr extrem gsi. Mer haend metem David (en Wwoofer us Tasmanie, wo oebrigens be eusem Huesli ufem Balkon schloft, obwohls au no frei Bett hetti =)) go Holz zaemelaese. Es send so chlini Wurzelteili gsi, wo anschiinend super send zum fuere, wells lang broende. de Paul het am Dave erchlaert weles Gebiet dassmer muend absueche. Zudem hetter gseit, dass wenns no Wurzelstoeck hett, choemer die jo au no useneh. Also haemmer eus ufgmacht, send go Holz zaemesammle (met drue Choeble) und oeber het naebbii au no dWurzelstoeck usgrabe. Am Schluss (so oebe die letzt halb Stund) semmer denn no churz oeberes Gebiet gfahre, wo de Dave fruehner schomol zaemeglaese het und haend dete nur no Wurzelstoeck usgrabe. Das esch zdrette chli schwerig gsi und so esch emmer chli oeber umegstande. Womer heicho send het de Dave am Paul verzellt, dassmer am Schluss ebe das so gmacht haend und denn hetter eus andersch doof agloh, dass das jo mega uneffizient seg, wemmer das so macht und dass das oeberhaupt ned didee gsi esch so, und wemmer emol es eiges Gschaeft hebed klappi das denn aber ned und und und. Dassmer aber en ganze Autoahaenger gfoellt haend (sletzte mol wo de Dave gange esch haends obe eder gliche Ziit de halbi gfoellt) heter ned oder velech au ned welle gseh. Ah jo, zudem hani nochhaer no schlaecht Bohne abglaese (hane Struch ede Gurke ene oeberseh), ha die orange Tomate no gloh (obwohli au die hetti selle neh) und anschiinend em Feriehuesli ed Kombination ine gschnette...

Mer fuehle eus be so Sache maengisch raecht apiist, au wemmer fang woessed, das Australier direkt send und au ned woerkli waend verletzte. Mech stresst das maengisch chli, dassmer das ned eifach so choene waegstecke und uf Lob warte, obwohls das jo gar ned umbedingt woerd bruche. Danke wenner chli a eus daenked und foer eus baetted, dassmer eus a so Sache besser choene dragwoehne und eusi Arbet au woerkli guet mached.

Wenns euch wunder nemmt, womer grad send goend doch churz go die zwoi Siitene aluege
www.paulsplace.com.au
www.wavesandwildlife.com.au

dFoetli folge sobald wie moeglech. CU

weder einiges erläbt

Die letzt Wuche semmer underwägs gsi. Mer händ vel gseh und glich muemer halt chli zuegäh, dass fast jedes Städtli, jedes Dorf, jede Camping chli esch wie de letzt. Das macht sReise leider ned nume läss. Mängisch esches sogar eher ermüedend und langwilig. Aber sguete esch, dassmer glich emmer weder uf neui Situatione trefft, lustigi Lüt gseht (mer händ eigentlech noni met eso vel Lüt Kontakt gha, settmer underwägs send, deför düemer gärn chli beobachte =)) und so schlussändlech denn doch öbis erläbt.

Mer send noch Melburn de Südküste noche. DStross, wo am Meer entlang lauft heisst Ocean Road und esch absolut touristisch. DKöste esch eigentlech wörkli sehr schön. Es esch em gägesatz zu de Ostküste vel welder, klippiger. Au dLandschaft veränderet sech zuenehmend. Es het vel weniger Bäum, deför Strücher (chli so wie ede Alpe) wo alles öberwuchered. D'Ocean Road füehrt ade bekannte 12 Apostle und de London Bridge verbii. Es het zudem no es paar anderi "Look outs" womer eifach chli cha uf Wegli a schöni Küstene laufe. Womer grad einisch a somene Ort zum Auto zrugg glofe send, esch eus es älters Ehepaar entgägecho und het eus gfrogt ebmer dPinguine gseh händ. Mer händ natürli kei gseh und send interessiert ene noche. Und tatsächlech, chli versteckt under de Holzkonstruktion wo als Usbleck dient het send es paar gsi. Sehr härzig!

Mer send denn noch spöter nochli vo de Südküste ewäg es Landes ennere und händ schnell gmerkt, dass dWüesti gar nöm eso wiit esch. Vorallem vel brun hämmer gsehl, plus es Städtli, womer dTouristeinfo ned gfunde händ (das esch mängisch die grösst Useforderig gsi am Tag =)).

Wiiter semmer denn noch Mt. Gambier. Söstlichste Städtli vo South Australia. Die Stadt esch amene Vulkan a boue (wo absolut ned so esch, wiemer sech en Vulkan vorstellt, es esch fast grad us gange zum Krater =)), und en wörkli schöne Kratersee het. Dete hämmer dänkt, mer lueged emol wägeme bellige Zemmer. Touriste Info het eus sBackpacker Hostel "the old Jail" (das alte Gfängnis) vorgschlage. Dete semmer denn au wörkli he go luege. Sehr en lustige und au gspässige Ort. Zum inecho, bruch min. 2 Code, und dZemmer send ede orginale Zellene inne. Dur das sends aber rächt chli, dunkel und luxuslos. Dos aber glich ned ganz eso bellig gsi send, hämmer eus entsched ned dete he zgo. De Herr Gfängniswärter het eus aber vorgschlage, dassmer döfed ufem Vorplatz parkiere und dCampingchuchi, Internet, Fernsehzemmer und WC Aalage bruche und das för 20 AUS (inkl Zmorge)- Das hämmer denn durchus fair gfunde und händ denn so em (oder besser gseit grad usse am) Gfängnis öbernachtet. DFrau vom Chef esch no en Schwiizeri gsii, dorum die herzerwärmende Chläber am Auto. DNummere esch eifach super gsi. DAustralier döfed dNummer sälber uswähle und dur das gsehtmer vel lustigi Nummer.

Mer send denn wiiter uf Adelaide klöpft und händ dete zwoi Täg lang dStadt und dMensche aglueged. De Wäg dohe esch sehr trostlos gsi. Obwohlmer lut Charte durch durchus bewohnts Gebiet gfahre send, hets ned meh gäh, als gradi Strossene, bruni Felder, und Schöf, tusigi vo Schöf.

Bsunders gfalle händ eus z'Adelaide die Dummies, aber au sehr cool esch de Central Market gsi, en Märt, met ganz vel feine, lustige, glustige und bellige Ständ. Dete hämmer wedermol rechtig feins Brot chöne chaufe.

Höt hämmer abem Cap Jervis dFähri uf Kangoroo Island gnoh. Ich be serste mol ufeme Scheff gsi em Meer und ha durchus chli respekt gha wägem Wellegang. Und de het sech den Au bestätiged. Es het gschaukled wie wahnsinnig. SFenster uf de andere Siite vom Boot esch mängsich ganz met Meer usgföllt gsi, well dFährig so schräg gläge esch. Aber mer zwoi händs also bedi ohni erbräche gschafft und send nochhär ed Hauptstadt vo do gfahre. Mer händ durchus chli es Städtli erwahrtet, aber eigentlech esches wörkli nur es Dörfli. De Michi esch echt fast echli gschocked gsi, dass das dHauptstadt sell sie, aber eigentlech hämmers müesser erwarte. Kangoroo Island het genau 2 Hauptstrossene wo betoniert send. De Rest send alles festdruckti Dreckstrossene. Aber jonu. Mer freue eus fest weder ufs wwoofe, uf Lüt und neui Kontäkt. Mol luege was eus die nöchst Wuche brengt.