alles got zänd, damol sogar meteme fürwerch

ganz ehrlech, i ha schomol besser koched als letzte Sunntig, aber das esch jo au glich. Die andere händs emu sowiit guet gfunde und mer händ no en lässe obe zäme verbrocht. Vorallem metem Badr. Met em hämmer no wörkli lang vorallem öber eusi zwoi Kulture und de Glaube gred. Esch sehr läss und interessant gsi.

Au am Mäntig Obig hämmer no en guete Obig gha. Mer händ no einisch lang plaudered, au metem Talal, eusi zwoite Saudi Frönd (vo em hämmer vorere Wuche en chlini Wasserpfife öbercho). Bem tschüss säge hämmer vo ene nomol Gschänk öbercho, de Michi en Thob (es echts Saudigwand) und ich en schöne Schahl. Mega mega lieb.

De Ziistig esch denn sehr guet und erfolgriich duregange. Gott luegt wörkli super zu eus, döfemer emmer weder erläbe und stuned jedes mol dröber! Alles esch super glofe. Die 3kg womer zvel gha händ, keis problem. Euses schwäre Handgepäck, ned emol dröber gred. Kei zuesätzlichi checks am Zoll (trotzt resige Backpackers) und so wiiter.

SHotel en Seoul esch es Tröimli. En Bus het eus grad voredra abgsetzt (vode Koreanair abote, för 14CHF pro person und das en min 1h fahrt) und dete semmer vomene Buttler met Wägeli in empfang gno worde. Er het eus sGepäck denn bes ufs Zemmer brocht, hami fasch chli gschämmt =)) SZemmer esch gross (met Sofa) zudem hämmer gratis Gym, Hallebad und es lässes Zmorgebuffet. So gnüssemers scho nur do.

Vo Seoul sälber semmer au rächt begeistered (emu secher ich =)). Es esch en unglaublechi Stadt. Met de Vorort sends 22mio Iwohner, 70% (!) wohne enere Blockwohnig. Das erchlärt denn die resige Hochhuus Sedlige. Ha nonie so öbis gseh! DHauptstrosse send modern und normald. Doch gotmer ene Siitestross, fendmer lässi chlini Strössli, wo eifach mega cool send und mer au fein cha go ässe (leider red niemer english und mer halt au ned koreanisch, so esches emmer no lustig =)).

Am Mittwoch semmer go zwoi schöni alti Paläst go aluege, sogar en Wachablösig hämmer döfe meterläbe. denn am Donnstig hämmer anen DMZ Tour welle. Verwached semmer 4min nochdem dassmer hette selle dete sii. Domer gwösst händ, dass de Tourbus aber erst e halb Stund spöter abfahrt, semmer sofort enes Taxi gumped und send dete he grast. Doch wies so het welle, ca 5min bevormer acho send, esch de bus abgfahre... so hämmer das Tagesprogramm chöne striche. Dank em Organisator müemer aber nüt zahle, sehr lieb. So semmer chli go shoppe. sehr speziell send do die grosse Ichaufszentre. das send meistens ned ein lade, sondern tusig chlini lädeli, alli ned grösser als ca 4quadratmeter. es esch wie amene märt, das eifach öber 6 grossi Stöck hinwäg. Zudem esch alles voll Lüt. Sehr sehr speziell und au ned wörkli mega läss, halt Koreanisch.

en halbtägigi DMZ Tour hämmer denn höt am Morge gmacht. DMZ heisst DeMilitarisierteZone. das esch en 4 km wiiti Zone um dGrenze zwösched Nord und Süd Korea. Mer het die errechtet, zum die zwoi Länder chli vonenand ztrenne. So semmer das go aluege, send enes Tunnel gange, wo Nordkorea nochem Chrieg boue händ, aber dSüdkoreaner gfunde händ (es get em ganze 4 so Tunnel, doch sie näme ah, dasses no vel meh muess ha... die letzte händs 1990 gfunde). Denn hämmer chöne uf Zone abeluege (aber ned fötele, es het zwoi Soldate gha wo das öberprüeft händ zudem hets en gälli fotilinie gha, hender dere hetmer döfe fötele, doch sie esch einiges vom Mürli ewäg gsi, so hettmer en glich ned vel vo Nordkorea druf gha =)). und denn semer no en neue Bahnhof go aluege, wo ganz nöch ade Grenze esch. Er sett quasi dOffeheit rechtig norde vom Süde zeige (es werd au Güter öber de Bahnhof zwösched de zwoi Länder hin und här gscheckt). noch de Tour semmer denn no go ässe. Noch dem glich fast scho tägige Programm semmer den no de Olymicpark go aluege, also eifach es betzli defo.

Jetzt semmer weder em Hotel, bereite eus uf morn vor (mer freue eus beidi fest ufs heicho) und mol luege, wassmer suscht no so mached, evt ed Gym go jogge? oder ad Bar (met jazzband) es Glas Wii go trenke. Velech au beides, schliessli esches euse letzti Obig vo eusere lange, sehr lässe Reis.

Mer danked Gott ganz fest, för die Ziit, förs Vorrächt, dassmer das alles händ döfe erläbe und för dBehüetig, grad au uf de Stross. 33000km ohni Chrazer esch wörkli es Wunder!

Danke vel mol, liebi Frönde, händer regelmässig euse Block gläse, hämmer regelmässig döfe Brechte vo deheime öbercho und hämmer emer weder döfe gspüre, dassmer vo euch treit werde. Mer freue eus ganz fest, euch weder nöcher um eus ume zha. Er send eus ganz fest wechtig.

Ade Sydney

Wow jetzt esch Ziit so rechtig gfloge. scho esches eusi zwoit letzti Obig do en Australie. Unglaublech wie schnell 8.5 Mönet eifach so chöne verbii go, aber au unglaublech, ufwas dassmer alles döf zrugg luege.

Mer beidi send wörkli dankbar, för das womer händ döfe erläbe, för alles womer ned händ müesse erläbe und för die veli Ziit womer zäme händ döfe verbrenge.

Die letzte zwoi Wuche send rächt Ereignislos gsi, wemmer ehrlech esch. Aber das esch au gar ned eso schlemm. Mer send vel chli id Stadt, händ zwöschedure au mol en erholsame Tag deheime gah (vo was au emmer dasmer eus händ müesse erhole) send go Spaziergäng mache und händ grad au dFreiheit wo die öffentleche Verchersmettel do abüte gnosse.

Eis Highlight möchtemer aber glich no met euch Teile.

Mer send am letzte Donnstig i Sydney Tower go ässe. Das esch mega läss gsi. Mer send wörkli grad am Fenster ghocked und dur das, dass sich de Sektor met de Tesch drufe treit het, hämmer so die ganz Stadt vo do obe chöne gnüsse. Unglaublech schön gsi. Dos Buffet gha het, hämmer denn au so rechtig herzlech drigschlage. So fest, dasses eus beidne rächt miis gange esch nochhär. Aber es esch glich en mega lässe Obe gsi.

Die letzte paar Täg semmer jetzt vorallem am Seoul plane, send am packe und am ussortiere (mer händ scho zwoi grossi Plastiksäck voll alte Chleider de Heilsarmee brocht =)). Morn gömer denn so rechtig in Entspurt. Wäsche, packe, putze und no die letzte Zög do gnüsse. Denn gots am Ziistig morge am sächsi per Taxi zum Flughafe.

I freu mi fest. So fest wieni die Reis gnosse ha und das ganze wörkli due als Vorrecht aluege, freuimi doch glich weder mega uf deheime, uf alli liebe Lüt wo dete send, uf die vertrouti Umgäbig und ehrlech gseit ned emol zletzt weder ufen greglete Alltag.

Höt Obig chochemer no schwiizerisch, Rüeblisalot, Älplermaccrone und Öpfelwäie. Eigentlech hämmer eusi WG Gspändlis dezue iglade, aber womer hoet dRosmarie so druf agsproche händ, het sie ganz erstund gfrog: ah, denn choched er höt obe. =). so luegemer denn wär ume esch und susch gnüsse mer das halt eleige.

De Michi studiert näbe mer grad no mini Vorschläg vo wäge Seoul und was go aluege. Bi gspannt wie das werd. Freu mi emu mega druf!

Sydney

I glaube, das get höt nur en churze Blog.
Mer send jetzt set zwoi Wuche en Sydney und gnüsses fest, au wemmer mol en Tag nüt mached wie höt.
DWG esch wörkli prima, mer verstönd eus guet, obwohlmer au ned mega vel zäme mached oder enand gsänd. De Badr, euse Saudi Frönd het grad Ramadan und dourm escher dure Tag eh ned eso vel ume. Esch glaub för en am eifachste, wenner au met Muslime zäme esch wo nüt ässe oder trenke.
Mer händ ede erste Wuche vorallem Ziit id Marta investiert, send sie Interssente go zeige, händ Service und so gmacht, send sie go putze und händ en neui Wendschutzschiibe inemacheloh. Denn hämmer sie verchauft, und zwor am letzte Mettwoch för 6000 AUS. Mer händ fast chli es schlächts Gwösse, wellmer jo eigentlech wössed, dass sie nöm so vel Wert esch, aber domer dänkt händ, de Chäufer werd eh no am Priis umetröcke hämmer sie mol zu dem Priis is Inti do und die zwoi Chäufer, zwoi jungi Gschwösterti us Dütschland händ denn prompt de ganz Priis zahlt! Scho au schön för eus =).
Sett do striehlemer chli ide Stadt ume, spaziere de lange Köstewäge entlang (Sydney esch wie umen lange Fjord umeboue) und gnüsse smeiste schöne Wetter.
Ade zwoi letzte Sönntig semmer en Hillsong Godi. Grundsätzlech gfallts eus guet, au wemer müend gestoh, dass eus die rühigere Godis deheime besser gfalled. Dgodis do send sehr professionell und das esch chli befremdend, au wennd dPredigte beidi guet und usefordernd gsi send.
Am Samstig semmer anes Drummelkonzert vo es paar Senegales, wod Rosemary de Manager esch vonene, das esch rächt läss gsi. Gester semmer metem Talal und de Tina (er Saudi Neffe vode Königin, sie en Libanesin) go chlätere. Das esch rächt läss gsi und mer fendes cool, dassmer do wörkli chli „Frönde“ gfunde händ, öbrigens alli Saudis =). Aber Ziit womer deheime oder em Usgang met ene verbrenge esch emmer läss und gmüetlech.
Jo i glaube susch gets gar ned eso vel zverzelle... I due eifach chli meh Föteli ahänke, so chöneder eus chli füehle =).

bereits eusi letzte Reisitäg

DRegelmässigkeit vom Afang het wörkli chli nochegloh, sorry.
Brisbane hämmer met de Füehrig ede Bierbroui abgschlosse. Es esch wörkli sehr faszinierend gsi, vorallem zgseh, wievel automatisiert esch. Es het wörkli amigs fast kei Agstellti meh ume. DFüehrig esch rächt läss ufboue gsi, zum Biispiel hets am Afang en Geschechtleche Teil gha, wo met velne usgstellte Gägeständ und Puppene, begleited vom Tonbändli echlärt worde esch. Leider esch sganze ned emol so eifach gsi zum verstoh, aber das womer metbecho händ esch interessant und läss gsi. Zum Abschluss hetmer vier verschedeni Bier döfe Probiere (und es het vo jedem wörkli es Glas voll gäh) aber i hami för die alkoholfrei Tour entschede, susch hetti glaub nöm chöne stoh =). Die zwoi Jungs händs aber natürlech gnosse und mer händ metem Francoise lang und usgebig plaudered. Esch worschiinli euses letze Treffe in Australie gsi, aber mer send härzelch uf Paris iglade worde und das chönemer jo nur schlächt ablehne =).
Wiiter semer den de Ostköste noche. Als nöchst Highlight het sSurfer Paradise uf eusem Program gsi. Es esch scho ganz en anderi Wält, de Teil vo Australie. Krass esch gsi, womer ufs Surfers Paradise inegfahre send. Du hesch vo wiitem eis Hochhus am andere gseh, alli direkt am Strand boue, alles met Hotel und Apartments. Das esch wörkli sehr speziell und es nemmt de scharm vom welde Australie total. Nichts desto trotz hämer das ned welle verpasse. Dos halt emmer meh Wenter werd, jemeh dassmer südlech gönd, esches nüt met sönnele im Bikini und eme Schwum worde, aber glich semmer zerst chli am Strand nochegschländered und händ spöter au sZmettag am Strand gnosse. Läss e so Momente esch halt au emmer dLüt rundume zbeobachte. Wetterbedingt hets secher weniger als em Summer, doch gets emmer no einiges zgseh, zum Biispiel die zwoi chline Jungs wo ohni Röcksecht uf anderi en Rutschbahn boue händ (und debii de alti Herr unde am Hoger abgschosse händ) oder die drü Chicks wo alli em Bikini gsi send (es esch wörkli ned heiß und wendig gsi!) und entweder sälber öber eri Schönheit gstuned oder ssech vo junge Herre händ lo bestätige loh. Au lustig esch Polizei ufem Quat gsi. Nemmt mi jo wunder, wies en böse Ma umetransportiert händ, sie hette secher verstärchig müesse hole. Mer händ Surfers Paradise wörkli gnosse, händs aber nocheme Tag au schochli gseh. So semmer es paar Kilometer wiiter südlech gfahre, händ eus dete emene Camping iquartiert und sruhigere Triibe dete nochli gnosse.
Wiiter semmer uf Byron Bay, de östlechsti Punkt vo Australie. Au Byron Bay esch weder vo uf Touriste usgrechtet, doch em Gägesatz zu Surfers Paradise hets kei Hochhüser und au de MC fendsch ned. Das esch sehr agnehm. Byron Bay esch wörkli au sehr läss gsi. Vorallem hets en lässige Spaziergang (womer gmerkt händ, wie fest dKondition scho nogloh het vor luter nüt mache...) zume Lüchtturm gha. Underwägs hämmer sogar Wale gseh (also eigentlech nur dWolke öber ene) und en härzigi Scheltchrot. Dos au do ned eso vel Lüt gha het, hemmer spöter de Strand grad chli för eus gha.
Denn hämmer eus entschede chli Inland zgho. Als erst hämmer Lismore bsuecht. Lismore esch weder en krasse Gägesatz zude Küste. DStadt esch rächt verschlofe, vel weniger uf Touriste usgstellt und dur das hetmer sGfüehl, segi grad wohnlicher. Am nöchste Tag semmer wie alli Touriste auf Nimbin. Nimbin esch es offiziells Hippidorf und bout uf dem uf. Dlüt wo dete wohne send wörkli sehr vo dere Ziit brägt und läbed das so wies usgseht rächt us. De Ort bestoht eigentlech nur us einere Stross. Die esch zoimt vo Luuter chline, alternative Läde wod vom gfliessed Pulli, öber de Chrütli Tee bes zude sälbergmachte Guitarre worschiinli alles chasch chaufe. Was ned offziel chasch chaufe esch Gras. De werder deför offe uf de Stross abote. Mer händ au emmer weder rauchendi Lüt gseh und händ eus schonosochli gwundered, wie do dPolizei im Ort funktioniert und send am Schluss drufcho, dasses do worschiinli eifach legal esch, susch hetti dPolizei de ganz Tag nur scho uf de Stross zdue. Es esch es speziells und lustigs Erläbnis gsi und glich hetmer scho au sehr vel Liichene gseh, wo eim glich au chli nochdenklech gmacht het. De Ischlag hämmer denn grad ufe nöchst Tag metgnoh. Dete semmer em Nochberdorf anen Märt (de Wäg dohe esch wunderwunder schön gsi, öber grüeni Högle, verbii a wunderschöne Hüsli met blüehnde Gärte, öbis womer do en Australie wörkli ned vel so gseht). De Märt esch sehr gross gsi und fendet einisch em Monet statt. Nochem Motto (offiziel) make it, bake it, grow it, show it werd fliisig usgstellt. Mer cha vorwiegend Chleider, Schmuck und Pflanze chaufe, denäbe gets natürlech vel Foodstand und au mäng en Könstler wo sini Musig zum beste get. Es esch sehr en lebhafts Triibe gsi und mer händs beidi fest gnosse, au wemmer eus emmer noni als wörkli Alternativ bezeichne =).
Wiiter hämmer noch Grafton welle fahre, händ aber in Yamba en halt gmacht. Ufeme Camping wunderschön amene Fluss gläge hämmer denn grad zwoi Nächt halt gmacht und händ en ganze Tag met fulenze verbrocht. Nocheme churze Halt en in Coffs Harbour (wo de Russle Crow wohnt, mer händen leider ned troffe =)) semmer inland uf Armidale gfhare. Dstross het sech als erst grad mol uf 750 MüM ufeschlängled und esch denn sanf öber dHögle a drü lässe Wasserfäll verbiizoge. Dwelt do obe schiint wörkli in Ornig. Nur all paar Kilometer chunt es verschlofnigs Dörfli, wo hauptsächlech vom Bure läbt, es het do kei gross Läde sondern alles werd no vode Detailläde bestemmt, was wörkli sehr läss esch. Mer händs eus au ned neh loh enen Broki go stöbere. Aber dosie privat esch, esch alles mega tüür gsi, worschiinli het förde Bsetzer jedi noso verrosted Zange en Sammlerwert gha =). Mer händ underwägs au emene Hotel Zmettag gässe und dLüt händ eus durchus befremdend agluegt, weiss ned, ebmer do sovel Touriste kennt. SGebiet do heisst öbrigens New England und esch au weder mega läss. I glaube mer gfallt das Höglige eifach eso guet, velech au wellsmi chli a deheime erenneret (ned dasses be eus sooo höglig wär =)). Gschlofe hämmer die Nacht emene Caravan und send sehr dankbar för die Entscheidig gsi. So hämmer nämli es Heizöfeli gha und händ em warme chöne schlofe wäredem sech veruse de Morgefrost gleit het. Armidale esch uf 1000 MüM.
Am nöchste Tag semmer denn weder em ähnliche Stil ad Ostköste gfahre. Do Australie ned chönt ohni eri Beefpies sii, hämmers eus ned welle entgoh loh, i eini vode berüehmtiste Pieläde go Pie ässe. Die Piebäckerei macht pro Tag 50 verschedeni Arte Pies, wo vom tratitionelle Pie he bes zum Aprikose Huehn Pie füehrt. Es esch wörkli sehr lecker gsi, Mer händ beidi grad zwoi vernast =). Die Nacht hämmer in Port Macquarie verbrocht. De Ort esch berüehmt för dHafesteimur wo ganz vermoled esch. Sehr läss, aber au chli trurig gsi, well vel Stei a öber Verstorbnigs erenneret, die hämmer de amigs ned gföteled...
Em Moment semmer grad en Forster. Mer send wäred eusem erste Wwoofe schomol en Tag do gsi und es gfallt eus wörkli super do. dSTadt esch umschlunge vomene Fluss, wo vel chlini Enseli und Sandbänk het und sganze so en ganz spezielle Scharm het. Mer öbernachte do ufeme wunderschöne Camping. Lustigerwiis esches eine vode schönste womer je gsi send (und mer send emmer uf rächt schöne) und de belligst. Wells em Moment eigentlech kei Lüt händ, hämmer so för de Priis vomene normale Platz en Ensuite Platz öbercho, das heisst mer händ es chlises Hüsli meteme Bad för eus eleige.
Eusi Umrundig vo Australie esch somet eigentlech fast fertig. Am Mäntig hämmer meteme Kolleg en Newcastle abgmacht, en kennemer au vom Wwoofe en Glouster. Dete wämer denn am Obig en Footballmatch go luege. Mettlerwele hämmers scho es paar mol em Fernseh gseh und vestönd dRegle und send fast chli fasziniert vom Tempo vom Spel. So hämmer dänkt, dass müemer mol Live gseh ha. Abem vorussechltech Ziistig ziend mer denn ene WG fast em Zenter vo Sydney. Mer wärde dete meter Australierin undeme Araber zämewohne. Mer freue eus rächt druf. Be ene bliibemer denn gueti vier Wuche und händ so vell Ziit zum sAuto ready mache zum verchaufe, zum no einisch dStadt und dUmgäbig gnüsse, zum wedermol chli Sache eleige zunderneh (uf das freuemer eus wörkli auch =)) und denn au azfange packe.
Am Ziistig, 15.09.09 started euses Flugzüg am zäh vor achti am Morge rechtig Seoul. Dete freuemer eus uf vier Nächt emene schöne Hotel em Cityzenter und uf die hoffentlech lässi Stadt. Denn am Samstig, 19.09.09 landet euses Flugi am foifi en Frankfurt. Ergendwie esches ganz speziell weder vom heigoh zschriibe. Mer freue eus fest uf alli liebe Frönde und Familie und wössed, dass sAbentür dete weder wiitergot, grad so met Job und Wohnig sueche. Und glich wössemer scho jetzt, dassmer das Land met sine Wiitine und de lässige Läbensistellig werde vermesse.

Sehenswerts

Hopla, jetzt hanis grad chli verhange metem Blog nochschriibe, jonu, denn mueni höt halt chli meh.
Mer händ bereits euse letzti Reisiteil agfange: mer send sett länger weder underwägs und händ scho schön vel döfe erläbe. Mer send jo jetzt ede meistbewohnte Area vo Australie und so gets au ganz vel zum gseh und zum mache.
Agfange hets metere Krokodilfarm. Das esch wörkli sehr interessant gsi, domer beidi eigentlech ned vel öber Krokodil gwösst händ, aber glich dure Norde met ene konfrontiert worde send. Dkrokodil werde do ghalte förs Leder (das werd öbrigens Gucci verchauft) und so händs nur relativ wenig grossi usgwachsni Kroks und tusigi vo chlini, wos de halt au relativ früeh näme förs schöne, no fiine Leder (wo 18-20 AUS pro Quadratzentimeter chosted). Es esch wörkli sehr en lässe Usflug gsi, womer vel händ döfe lerne und au en Krokodilburger zum Zmettag gnüsse.
Denn semmer wiiter de schöne Küste abegfahre, händ i mengem Städtli und a mengem Strand halt gmacht und eifach die schöni Welt do gnosse. DGebäude en Queensland send rächt läss, sochli em amerikanische Stil, grossi, verzierti Verandas.
Wamer eus au ned entgoh lo händ esch dRum Distillerie vom Bundaberg Rum, de berüehmtisti Rum do. Das esch rächt läss gsi, vorallem Zahle send rächt krass gsi. Die stelle pro Tag 35.000 Fläschene Rum här (5 Arbetstäg ede Wuche) und exportiere nur 4%! vor es paar Johr händs welle afange noch Amerika exportiere und händ dProduktion um 30% erhöt. Doch denn händ eifach dAustralier 30% mehr drunke, so düends glich emmer no nüt uf Amerika exportiere... Mer händ dete em Lade denn au no en feine Liquer kauft. Chamer guet zum Kafi trenke, so alli Kafi met Siitewagetrenker, freuet euch uf eus =).
Natürlech esch denn eine vode Höhepönkt cho, wo jede Backpacker macht, Fraser Island.
Fraser Island esch en Sand Insle, womer doher nur cha metem 4x4 druf und sie esch wörkli sehr berüehmt. Normal gotmer entweder meter Tour druf, oder duet sech met so 10 andere Backpacker zäme und mieted es Auto. Do mer jo aber en eigene händ und das glich belliger esch, als metere Gruppe, hämmer eus entschede sälber zgoh. Lustig esch, das Lüt, wos verzellsch alli ganz andersch reagiere. Vel händ gfunde mer seged sehr muetig und händ eus weldi Gschechte verzellt, wa scho alles passiert esch und das jensti Lüt sterbed uf de Insle jedes Johr und so wiiter. Mer send denn wörkli rächt verunsechered uf de Fähre rechtig Insle gfahre. Zum secher goh, hämmer eus no en Schufle kauft, so chöntmer sech usem Sand usgrabe, emu bestemmt es betzli.
Aber ganz ehrlech. Es esch wörkli problemlos gange, alles. Domer jo au scho vorhär uf Sand gfahre send, hämmer chli gwösst uf was luege, aber mer händ nie au nur en Situation gha, womer dSchufle oder so hette müesse bruche. Es esch amigs sehr lustig gsi, dLüt ede chrüzende Autos zbeobachte. Sehr vel hämmer sehr agspannti Gsechter gseh, meistens grad öbe 10 i eim Auto =). Mer mues fairerwiis säge, dasses scho ned ganz eifach esch uf Sand zfahre. De Michi esch aber super und secher gfahre, ich has nur churz probiert. Dinsle esch wörkli schön gsi. DWege händ sech vel dure Urwald gschlängled und das esch sehr schön gsi. Mer het au am Strand chöne fahre. Mer het eifach müesse uf dEbbe und Fluet achte. Aber wennd rechtziitig gange besch, esches fast wie ufere Stross gsi. Rächt cool esch au no sWrack gsi, wo rächt nördlech vode Insle am Strand liit.
Gester semmer denn ad Sunshine Coast, eini vode berüehmtische Kösteabschnett vo Australie. Es esch wörkli sehr schön, aber au sehr öberbout, met resige Hotel und Gschäftskomplexe. Mer send dete vorallem no es Aquarium wo sehr berüehmt esch und es esch wörkli sehr läss gsi. Es get so vel komischi und lustigi Fesch. Zudem esch sHaichäfig rächt läss gsi. Mer esch undereme Glastunel duregfahre, und zwor stehend ufeme Flüssband =). Sehr lustig gsi, aber au sehr läss.
Sett gester semmer in Brisbane. Mer gnüssed dStadt und gönd morn go XXXX Gold Brauerei aluege, hoffentlech metem Francois eusem Gspöndli womer bem Olivepflöcke kenne glernt händ.

Im wilde Oste

Was fören Wuche!

Chli verspöted, nämli erst letzte Friitig hämmer en Bloomsbury weder agfange wwoofe. D'Renderfarm ghört ade Beth und am Ray, emene end-föfzger Ehepaar wosech das Land vor 1.5 Johr kauft händ und sech do jetzt eres vorussechtlech letzte Huus zum Alt werde ufbout händ. Sland vo ene liit am Endi vonere 10 km lange Dräckstross, noch ene chunt nüt meh. Dass heisst, kei Verchehr, kei anderi Lüüt, nur en wunderschöni Högellandschaft met Regelwald öberwachse, 500 Chüeh und die übliche Vögel. Shuus womer es Zemmer undes eignigs Bad devo döfe nötze esch vor 18 Mönet vo ene agfange boue worde und esch wunderschön und wörkli so guet wie fertig.
Us dem wo no zmache esch, bestoht eusi Arbet. De ersti Tag hämmer Liistli gschlefe und lackiert, settem drette Tag, also am Sunntig, semmer dra amene Sofa öberzieh. Es sehr es interessants und lässes Projekt. De Michi het vorallem am Afang gholfe, de alti Öberzug abzneh und de neu Stoff, womer duet direkt as Gstell mache, anagle. DBeth und ich send sett do am Chösi öberzieh und Ziehrchösi schniidere. Höt am Mittag hämmer das Projekt offiziel abgschlosse und sEndprodukt chasech echt gseh loh. Es esch wörkli rächt schön, wemmer dra dänkt, dass niemer vo eus schomol es Sofa azoge het! Die andere Täg het de Michi am Ray gholfe, dLiistli zfixiere und Gsteller idi no leere Abstellchamere zbastle.
Am letzte Samstig hämmer aber en Tag Pause gha vom naie und händ met de Render gschaffed. Aso ich ha eigentlech nüt gmacht, ussert Fotene, und dStöck ghebet, wos amigs de Chüeh de Weg durd Ghäg gwese händ. Gmacht hämmer folgendes:
Es send alles relativ jungi Chüeh und Bulle gsi, dass heisst, mer het sie müesse gäge Zecke behandle und brandmarke, dBulle hettmer zudem müesse kastriere und dene met Hörner dHörner abschniide. Es esch en rächt ruchi Sach gsi, definitiv. Zerst hämmer die ganz Gruppe vo 60g Tier (wo em alli em einte Ghäg gsi send) halbiert. Die Hälfti wo als erst dra cho esch, hämmer rechtig „Schleuse“ ines anders Ghäg do. Vo dete hämmer denn emmer so ca 15 Tier enes no chliners Ghäg grad vor de Schleuse bugsiert. Dschleuse bstoht us zwoi Chammer, wo je ca 5 Tier wörde ineghöre. Do aber ede vordere Chamere sTier esch, wo grad bearbeited werd, hettmer so max ca 6 Tier denne. Also werd emmer ei Chueh edi vorder Chamere do, denn werd hende dSchiebetöre gschlosse, das kei anderi cha ine cho. Das dönt sehr eifach, aber do meh als nur ei Chueh i die vorder Chamere inepasse, esch das emmer chli en Sach, bessmer Tier trennt het. De Chueh ede vordere Chamere werd denn de Chopf iklemmt, dass sie sech nur begränzt cha bewege, denn werd schnell chli Zeckegeft uf de Rögge gsprötzt, zum Zeiche dassmer das gmacht het am Schwanz chli Hoor abgschnette und denn werdsie met einere Manneschraft am Schwanz ad Chammerewand zerrt. Uf de andere Siiter stoht denn de metem Brönnstab und so werd dChueh brandmarkt. Das macht ere eigentlech ned weh, sie händs halt eifach ned so gärn, wemmer so am Schwanz zeiht =). Bede Bulle werd denn grad au sofort kastriert und das ned emol so kompliziert. Meteme Skalpel werd de Hodesack ufgschletzt, denn werd ein Hode nochem andere eifach usegresse. Aber au das schiint em Bulle ned meega wehzdue, au do esch sProblem weder eher, dassies eifach ned soo gärn händ, wemmer ene am Hode umemacht. Do händs scho mängisch rächt protestiert, und de Michi, wo de Schwanzhalter gsi esch a dem Tag, het amigs rächt müesse entgägehebe. Obwohls no relativ jungi Tier send, hett scho rächt grossi und starchi Männli drunder. Denn chunts Hörner abschniide. Das esch die Aktion wo am bluetigste und am schmerzhaftigste esch. dHörner werd eigentlech eifach metere grosse Zange (wo chli usgseht wiener Zigarreschniider) abknippst. Doch umsogrösser dHörner scho send, umso stränger esches und umso meh machts de Tier. Do händs eim amigs schochli leid do, aber das ghört halt eifach dezue. Be öbe drüne hetts denn au mega blüetet. So rechtig wiit usegsprötzt. Em Summer wördmer dHörner ned schniide, wells Bluet weniger schnell sickered. So chönte dChüeh verblüete. Aber eusi Tier händ alli nöm blüetet, besmer sie weder uf dWeid gloh händ. Es esch sehr läss gsi, das emol döfer zerläbe, au wenns schochli raff gsi esch.
Am Samstigobig hämmer denn sWelde Weste Fieber grad wiiter gmacht und send anes Rodeo. Es esch rächt es chlises gsi, aber dos euses erste gsi esch, womer gseh händ, esches super gsi. Also eigentlech esches es Bullriding gsi, dass heisst, dRodeos send uf Bulle und ned uf Rösser grette. De Fanfaktor esch wörkli gross gsi. Vorallem krass send wörkli die Bulle gsi wo noch dem, dassie de Riiter abgworfe händ, de grad agreffe händ. För das hets denn aber Bullfighters, wo zwösche sTier und de Rodeo inegönd und die Allfällige Schläg istecke. Wörkli zu usgfüehrte Agreff esches aber ned mängisch cho. Vell händ dBullfighters dTier chöne ablänke und sech denn en Secherheit brenge. DBulle send zum Teil sehr lang agrefflustig blebe und händ nüt welle wösse, vom Feld ruume. Aber bes am Schluss, meistens noch muetige Aktione vode Bullfighters esch no jede Bulle usde Arena usetrotted. För Zueschauer hets öbrigens no en „schönste Cowboy und Cowgirl“ Wettbewerb under de Chend gäh. Vell härzigi chliini Chend met Cowboyhüte und -Stefle. Spöter hets denn au no e Chälblijagt gäh, wo Zueschauer en Zwoierteams händ chöne atrette und es Chälbli hendere Linie müesse an Bode rüeher. Tönt definitiv eifacher allses esch. Scho die chliine Chälber händ sech nüt lo säge loh =). Es esch sehr en lässe Obe gsi, sehr läss hämmers döfe erläbe.
Am letzte Ziistig hämmer denn grad no einisch öbis eher Raffs „döfe“ erläbe. Also eigentlech hämmer jo freiwillig metgmacht =). Zwoi Bekannti vo Beth und Ray send uf erem Land uf Sauejagt. Sie händ eus netterwiis metgnoh. Anschiinend esch das do no rächt üblech und so hämmer das ned welle verpasse. SGanze esch eigentlech rächt simple, aber au rächt brutal. Mer got met Hönd (mer händ zwoi Doberman debii gha) en Rägewald go laufe. Denn, ergendeinisch, wettere dHönd en Sou und verfolged sie und brengesiesie met Gwalt zum ahalte. So warte dHönd denn (dSou am Ohr hebend) bes dLüt azsprenge chömed (sobaldmer die protestierend Sou ghört, werd usem spaziere es rächts ghetzt dure Urwald, dasch no läss gsi!). DSou werd denn packt und erstoche. Dos vel Weldsäu het ede umgäbig machts grundsätzlech de Natur nüt, aber glich hets grad mech schochli raff dunkt. Vorallem händs die Sou, womer gfange händ, eifach lege gloh. Sie werd dete vo Dingos und andere Säu gfrässe. Wemmer chli zentraler gläge wär, wördmer die tot Sou verchaufe, die werd öbrigens meistens uf Dütschland gscheckt, worschiinli als Spezialität...
So hämmer wörkli einiges döfe erläbe, vorallem vell einmoligs. Mer händs au met ene zwoi wörkli guet. Dbeth esch öbrigens en fantischi Quiltlerin, sie macht Patchworks, vell Bettöberwörf, macht Teschdeckene, Stoffhönd, -Kängurus und Puppene. Natürli alles schön verziehrt und bestickt. Do alli liebe Wwoofergirls wo wänd, öbis chlises met erem Material döfe naie, benich jetzt wie weld am Stecke. Es get es schöns Nodelchösi und en Chörbliöberzug, woni nochhär so chlini Naisache cha driidue =). Es machtmer wörkli vell Spass und do ich jo öbis ha döfe uswähle, esches au gar ned eso wüest =).

bes Gärtners

Settem Donnstig semmer also do uf de Blueme- oder besser Pflanzefarm. Nochem letzte mol wwoofe semmer wörkli gspannt gsi. Dfamily do esch aber wörkli ganz lieb und so hämmer eus rächt schnell igläbt. Zude Familie ghöre zwoi Chend, de Sean und dJanine, zwoi Hönd, Hüehner, Tube und dEltere, de Scott und dAnn. Darbet esch dur das, dasses e Pflanzefarm esch, rächt eisiitig, grad för mech... I be set am Friitig am umtopfe, döngere, töpf putze und weder umtopfe. Wells jo kei strängi arbet esch, gotsmer jo eigentlech ganz guet debii und trotzdem. De Bach, woni Töpf dene due putze esch rächt chüel und do sWetter ned meega heiss esch (scho emmer no so um die 25C) esches gar ned eso eifach, noch 4h dFüess em Wasser zha weder ufzwärme. Umpflanze dueni sitzend ufeme Stuehl, dass heisst, eigentlech klappimi denn drofe zäme, so dassi halt guet am Bode mag lange, das esch ned emol soo super för de Rögge, donis halt au bis zu foif Stund am Stöck mache. Aber susch wotti ned chlage =). De Michi hets körperlech vel stränger. Sie send wie fast alli Australier nochli am boue, sHus esch wie fast öberall eifach noni fertig, und au dUmgäbig ned. Die Wuche het de Michi vorallem gholfe landschaftsgärtnere. Stei ufbiige, Erde, Dönger und Mulch drufbiige, Schneisene för Ablaufröhre grabe, Ches verteile und so wiiter. Er esch emu ganz erlediged, doer halt scho länger nöm ganz eso strängi, körperlichi Arbet gmacht het.

Met de Familie hämmers wie gseit wörkli guet. Am Afang esches ned mega härzelch gsi, aber das het glaub ned emol met eus zdue gha, sondern met de Tatsach, dass dEltere vo em (so quasi die verhasste Schwegereltere vo ere) em Dorf emene Hotel wohned und dorum eigentelch jede Tag verbiilueged. DAnn het wörkli ned emol so freud dra. Met de Schwegereltere segs glich wie met Fesch, hetsie gseit, nöch drü Täg stenkes.
I eusere Freiziit hämmer e dere Wuche ned emol so vel gmacht. Domer emmer bes ca am drü gschaffed händ, semmer amigs chli zfuul gsi, zum no gross öbis zundernäh. Mer händ dorum vel Pingpong gspelt. Das esch wörkli rächt läss! So chumi sogar chli drii. Ned dassimi metem Michi wörkli cha mässe, er muess emmer no schön brav spele, aber glich hani meh oder weniger glernt, vorhand zspele und zwöschedure klappeds au mol zum eine schniide... Grad vori hämmer en Match gspellt, woni 13-15 verlore ha und das esch glaubs sbeste bes jetzt, und das be Spelpraxis vo bes zu 2 Stund am Tag. Aber es macht eus beidne Spass und das esch jo dHauptsach. Schlofe duemer öbrigens emne Zält undereme Schärme. Mer gfallt das no rächt, es schmöckt chli wie sYvonnand, so liecht gräuelig =). Aber dur das, dasses ede Nacht scho rächt chüel esch, chönemer super schlofe e eusne flauschige Schlofsäck. Was ned nur mega eifach esch, esch de Morge =). Wenns no dunkel esch, fot de Göggel a chreie und weckt eus regelmässig. Er ziehts wörkli öbe e viertel Stund dure und esch denn weder ruhig föres Ziitli. Nochdem dass grad so wieder igschlofe besch, rattereds sSugercanisebähnli obe ade Schüür dure. (do hets ganz vel Rohrzuckerfelder und dÄrnt werd fast emmer metem Isebähnli zude nöchste Fabrik brocht). Aber domer jo wie emmer au do ned eso spot es Bett gönd, esch das jo denn glich ned wörkli es Problem.
Morn schaffemer no einisch und fahred denn am Nomittag wiiter rechtig Süde. Dete düemer denn bereits am Donnstig weder afange wwoofe und zwor ufere Renderfarm. Mer freue eus fest dete druf, wellmer das halt nonie erläbt händ. Evt esch das denn scho euses letzte Wwoofe, Ziit raast so rechtig, au wemmer jo scho noni ganz bald heichöme.

ganz vel verschednigs

Do leider de Blog ide letzte paar Wuchene ned ganz eso regelmässig aktuallisiert worde esch, gets worschiinli chli en längere. Ned verpasse döfeder de letzti Teil =). Dete beschriibt de Michi, was em amigs eso dure Chopf got, wemmer en ganze Tag nur Auto gfahre send. Sehr empfälenswert =)
Die letzte guet zwoi Wuchene semmer wörkli rächt vel em Auto ghocked. Mer send de Uluru go bestunde und send denn direkt idi Wunderschöne Tablelands vom norde vo Queensland gfahre.
De Uluru esch eigentlech rächt läss, aber glich ned esoo spektakulär gsi. Erstundlech esch wörkli, dass er eifach so emene ganz flache Gebiet usem Bode ragt und au dForm esch rächt cool. Mer händ met jenste andere Lüt denn au no de Sunneundergang bestund, aber de esch ned emol soo spektakulär gsi. Ergendwie hämmer dänkt, dasser denn wörkli so ganz speziell rot lüchtet. Aber er lüchtet eigentlech ned meh, als alli andere Sache emene Obigliecht.
Vom Uluru hämmer eus denn e vier Täg zerst noch Mt. Isa verschobe, dete hämmer dChelbe wo grad em gang gsi esch gnosse. Dpriise händ eus fast chli henderegschletzt. Das ufs Gländ cho besch het scho 13 AUS kostet, dBahne so vo 7AUS ufe. Mer händ eus denn no längere ede Usstelligshalle vergnüegt, es het dete ganz vel Wettbewerbe gha. Vom Foti öber dBlueme zum Chueche esch eigentlech alles debii gsi. Sehr lustig.

ou jo, de vogel hani uf de Fahrt dehe ufgläse, und do dregle esch, das de wos Tier verwötscht, sTier mues abchraze, esch das halt mini leidi Ufgob gsi.
Noch MT. Isa händ denn langsam Tabellands agfange. Das esch sGebirge do wo wörkli sehr sehr schön esch. Dberge send alli meteme Urwald öberzoge. Am Afang hets fast chli usgseh wie ede Schwiiz. Mega läss. Dete hämmer au es Schwiizer Resti gfunde und händ sett 5.5 Mönet wederemol e rechtig feini Bratwurst gässe, mmmmh mega fein.
Denn hämmer am Sunntig agfange wwoofe. Es esch wörkli serste mol gsi, wommer eus vo Afang a ned wohl gfüehlt händ. Wenns nochem Michi gange wär, wäremer am Mäntig scho weder gange. Mer send denn mol no blebe, händ aber scho am Mäntig weder die erste neue wwoofer Mails verscheckt. Esch ned nur eifach zbeschriibe, was ned guet gsi esch. Worschiinli het eifach dChemie ned gstumme. Grundsätzlech hämmer rächt cooli Arbet gah, vorallem schriinerle und striche. Sie send glaube sehr froh gsi, semmer dete gsi und händ eus das au emmer weder gseit. De Michi het au es eiges Arbetsauto gha... =) Aber näbedem schaffe hämmer sochli sgfüehl gha, wenns eus wörkli ned. Zum Biispiel hämmer nochem Znacht wenn de chlii (4) es Bett esch au fast nur es Bett chöne. Sie händ emmer am Obig rächt vel drunke und kifft und domer ned es Büro händ döfe (wo de Fernseh gsi wär) und ned ed Stube händ chöne, do dZemmertöre vom Chliine us Glas gsi esch hämmer eigentlech nur ede Chuchi chöne sii... Au bem Ässe (was vorallem de Michi gstört het) hetsie (vorallem dJo) eifach greut. Sie het nie gfrogt, ebmer nochli welled, so esch de Michi eigentlech emmer hungrig gsi. Und woner einisch Fleisch agschnette het, und das chli grosszögiger als sie hette (aber no lang ned unanständig gross) hetsie öbis dezue gseit. Am Mittwoch hets dezue nochli en „grössere“ Krach gäh. Zerst hämmer wörkli dänkt, jo chom mer haues doch eifach, händ eus denn aber chli besunne und dänkt, dasses doch ned cha sie, wäg so öbis chliinem grad sHandtuech hezwärfe. I ha i denen Täg rächt vel ufe Chlii müesse ufpasse und am Donnstig hett Jo denn brüeled, weller mech lieber het als sie. Das esch denn de Punkt gsi, womer wörkli gseit händ, dasses das ned brengt. Am Friitig morge semmer gange.
Sett do hämmer dOstküste weder bestuned, met dene wunderschöne Stränd und send en Cairns glandet. Cairns esch rächt läss, esch schön grüen, het vel netti Restis und en schöni Meerespromenade (au met könstlichem Pool). Noch zwoi Täg dStadt besichtige semmer gester uf dGreen Island gange. Cairns esch jo quasi dHauptstadt vom Great Barrier Reef und so hämmer das au welle gseh. Green Island esch nur en chliine Teil vom Reef und esch halt ned ganz so wunderschön wies offnige Reef. Doch dos en Insle gsi esch, hets halt nochli meh alternativene zum tauche gäh, wo grad före Michi halt nochli besser gsi send, susch wär er eifach en Tag ufem Boot ghocked. Mer händ en Glasbodeboottour bueched, wo sehr läss gsi esch zum dKorallene gseh, denn hämmer au no en SEMI-SUB Tour gnosse, womer im Wasser ghocked send und so dFesch chli besser gseh händ. Ich be denn au no go schnorchle und es esch wörkli mega gsi. All die wunderschöne Fesche und Pflanzene. Em Gägesatz zum letzte Mol hani fast nöm usem Wasser welle =). dFotene send halt ned esoo guet, aber hoffentlech gänz glich chli en Iidrock.
So i muess ufhöre, e 10 min fangds Wasserairobic a do ufem Camping =). Mer fanged am Mettwoch weder noimed met Wwoofe a, enere Bluemefarm. Hoffentli werds chli besser, i ha fast chli Angst devo.
Und jetzt joned am Michi sini Gedanke verpasse =)
(vor Mt.Isa) Mer send höt bereits vier Stund am Autofahre und de Michi macht e chlini Erzählig:
„Setem letzte Wwooferplatz semmer 13000 km wiit gfahre. Das heisst, öbe drü viertel devo benich gfahre und dur das dasses ned en sehr interessanti, abwächsligsriichi Gägend gsi esch het sech de Michel halt susch versuecht ablenke. Die womech besser kenne, wösse, dassi sehr gärn due zelle und zwor alles mögleche. Do esch zum biispiel de Abstand vo Strossepfoste zu Strosseposte normalerwiis 100m, es cha aber starch abwiiche, well dAzahl vode gschrechlete Mettellinie dezwösche ned emmer glich esch. SMaximum liit be 27, sMinimum be 17, usgnoh vode Bruggepföste, de chas no vel weniger sii. Durchschnett betreit circa 22 was denn ebe öbe 100m usmacht.
Was mech natürlech au emmer beschäftige mag send die diverse Grüsch wos bem Fahre macht, sigs es quitsche oder es knarre, doch i hami mettlerwile müesse demet afrönde. Was mech au sehr fest beschäftiged esch Tankazeig. Mer händ 135liter em Tank und 20liter Esatz ufem Dach, dass lot mech sehr vel loh rächne, aber meistens stimmt de Verbruch de glich ned met mim grächnete öberii. So hämmer dMarta fast scho einisch zude nöchste Tankstell müesse stosse. Die diverse Steischläg ede Frontschiibe muesi natürlech au emmer weder kontrolliere, ebs ned grösser worde send. Zum Teil wärdes sogar zur Kontrolle metem Felzsteft markiert. Au de Reservetank ufem Dach esch emmer weder en Bleck wärt, eber ned verrötscht esch. Was öbrigens au sehr interessant esch bede Kurvene, send di gstrechlete Linie uf de einte Siite vode durezognige Linie zelle. Do betreit de Durchschnett ca 27 Felder, de normalfall esch so um die 21 Felder, schunt aber glich öbe vor, dasses wiitus meh cha sii, wo de Rekord be ca 52 liit, usgnoh esch do de einti spezielli Fall, wos öber 138 Felder gsi send. Au de Güeterzug het eus einisch zum ahalte brocht, und es send also 3 Loks und 234 Wäge gsi. Dstrosseverhältnis händ ned eso grossi Abwichige vo West Australie öbers Northen Territory zu Queensland, wobii uffallt, dass em Norden Territory sehr vel Falschmarkierige gha het und sie dur das eifach dröbergstreche händ, was mer szelle ned grad erliechtered het. De Strosserand: Im Allgemeine sehr suber, gepflegt, frösch gschnette aber au do, em Northen Territory uffallend vell Bierdosene und Bierkartons am Strosserand. Die tote Tier variiere vo Bundesstaat zu Bundesstaat ned sehr fest, es get Kanguruus, Schlangene, Dingos, Chüeh, Vögel und Wallabies. Sussehe vo dene arme Tier esch aber sehr verschede. Do gets die Flache, mehr mol öberrollte, und de gets (dMehrheit) wo tot am Strosseland lege und no rächt guet usgsänd. Wobii do gets au weder starchi Underschiide, mer gseht guet, wie lang das scho dete legged, es get die vo gester, de gets chli die ältere, wo ufbleit send und dBei id höchi strecke. En wiiteri Stufe esch scho nöm ufbleit, wobii mer eigentlech nur no Hut und Chnoche gseht und zum Schluss gets de nur no sChnochehüfeli. Die interessantischte send aber die wo frösch tot send und de Adler sTier bereits ufgschletzt het und grad am fresse esch. I ha dänkt, mer tüege das Fotografisch ned festhalte.“

Obetüür Australie

SObetüür got wiiter!

Nochdem dassmer wie bereits gschrebe euses Visum händ chöne verlängere hämmer eus rechtig Litchfield NP ufgmacht. Dete hämmer zwoi Täg lang die vele schöne Schluchtene, Wasserfäll und Pools gnosse.

Wiiter esches denn rechtig Alice Springs gange. Underwägs hämmer sehr vel Waldbränd gseh. Em Moment send dass aber "controlled burnings" wiemer dem so schön seit, dass heisst, mer duet extra de Wald azönde, dass dVegetation sech weder besser cha verbreite. Wies ganz gnau lauft, wössemer au ned, vorallem ned, wiesisi wörkli düend kontrolliere, aber glich semmer fasziniert gsi vom Füür, wo so en gwalitig Chraft het. DFahrt susch esch relativ lang gsi dete he und so hämmer underwägs ufeme Homestead gschlofe. Es esch au dasmol rächt läss gsi, vorallem wells am obig am sebni en Diashow gäh het öber dRenderfarme, wo das Homestead en Teil devo esch. Es esch wörkli interessant gsi mol e de Teil vode Fleischindustrie inezluege. Läss esch aber au gsi, dass wörkli sehr vel vode Camper die Show glueged händ. so esches en rechtige Event worde. Sogar hämmer nochhär no döfe Wasserrüetle und Geisslechlöpfe, obwohl grad szwoite bemer ned klapped het, trotz de vele guete Rotschläg vode umstehende Routiniers =).

Mer send denn am Samstig obig en Alice Springs acho und händs eus ufeme Camping gmüetlech gmacht. Öbe e Stund nochdem dassmer achosend, mer händ henderm Auto am Teschli gwörfled, het ufzmol öbis komisch tönt und sekunde spöter het dMarta brönnt!! Mer send schön verschrocke. Leider hämmer dHube fast ned ufbrocht, sMARTA-Scheld erschwärts sehr. So esch eus schlussendlech nüt anders öbrig blebe, als Scheld abzriise und dHube denn zöffne. Zwoi nätti Nochbere (wo grad e dem Moment acho send) händ eus gholfe sAuto zlösche. Brönnt het eifach de Alasser. Mer send sehr dankbar, dasses het döfe ufem Camping passiere und vorallem dure Tag und ned dur dNacht womer gschlofe händ. Glich esches en rächte SChock gsi. Natürlech esches Samstig gsi, so semmer am Sunntig ufem Camping festghange. Dos aber am Morge es gratis Pancakezmorge gäh het, esch das ned emol so schlemm gsi. Vorallem hämmer dete au jensti Lüüt kenneglernt und vel plaudered. De einti Ma het eus denn mega lieb am Mäntig zunere Garage abgschleppt und dete hämmer denn euse Alasser gfleckt und eusi MArta esch jetzt isatzbereit.

Morn fahremer zum Urulu, dem bekannti roti Berg em nüt. Mer freue eus druf, obwohl, eigentlech fahrsch 800km retour, nume um de Berg zgseh, aber jonu, es betzli liide muemer halt als Tourist.

Danke vel mol, för all die liebe nochfroge bezöglech Visa und so. Esch schön zgspüre, dass er so a eus dänked.