bereits eusi letzte Reisitäg

DRegelmässigkeit vom Afang het wörkli chli nochegloh, sorry.
Brisbane hämmer met de Füehrig ede Bierbroui abgschlosse. Es esch wörkli sehr faszinierend gsi, vorallem zgseh, wievel automatisiert esch. Es het wörkli amigs fast kei Agstellti meh ume. DFüehrig esch rächt läss ufboue gsi, zum Biispiel hets am Afang en Geschechtleche Teil gha, wo met velne usgstellte Gägeständ und Puppene, begleited vom Tonbändli echlärt worde esch. Leider esch sganze ned emol so eifach gsi zum verstoh, aber das womer metbecho händ esch interessant und läss gsi. Zum Abschluss hetmer vier verschedeni Bier döfe Probiere (und es het vo jedem wörkli es Glas voll gäh) aber i hami för die alkoholfrei Tour entschede, susch hetti glaub nöm chöne stoh =). Die zwoi Jungs händs aber natürlech gnosse und mer händ metem Francoise lang und usgebig plaudered. Esch worschiinli euses letze Treffe in Australie gsi, aber mer send härzelch uf Paris iglade worde und das chönemer jo nur schlächt ablehne =).
Wiiter semer den de Ostköste noche. Als nöchst Highlight het sSurfer Paradise uf eusem Program gsi. Es esch scho ganz en anderi Wält, de Teil vo Australie. Krass esch gsi, womer ufs Surfers Paradise inegfahre send. Du hesch vo wiitem eis Hochhus am andere gseh, alli direkt am Strand boue, alles met Hotel und Apartments. Das esch wörkli sehr speziell und es nemmt de scharm vom welde Australie total. Nichts desto trotz hämer das ned welle verpasse. Dos halt emmer meh Wenter werd, jemeh dassmer südlech gönd, esches nüt met sönnele im Bikini und eme Schwum worde, aber glich semmer zerst chli am Strand nochegschländered und händ spöter au sZmettag am Strand gnosse. Läss e so Momente esch halt au emmer dLüt rundume zbeobachte. Wetterbedingt hets secher weniger als em Summer, doch gets emmer no einiges zgseh, zum Biispiel die zwoi chline Jungs wo ohni Röcksecht uf anderi en Rutschbahn boue händ (und debii de alti Herr unde am Hoger abgschosse händ) oder die drü Chicks wo alli em Bikini gsi send (es esch wörkli ned heiß und wendig gsi!) und entweder sälber öber eri Schönheit gstuned oder ssech vo junge Herre händ lo bestätige loh. Au lustig esch Polizei ufem Quat gsi. Nemmt mi jo wunder, wies en böse Ma umetransportiert händ, sie hette secher verstärchig müesse hole. Mer händ Surfers Paradise wörkli gnosse, händs aber nocheme Tag au schochli gseh. So semmer es paar Kilometer wiiter südlech gfahre, händ eus dete emene Camping iquartiert und sruhigere Triibe dete nochli gnosse.
Wiiter semmer uf Byron Bay, de östlechsti Punkt vo Australie. Au Byron Bay esch weder vo uf Touriste usgrechtet, doch em Gägesatz zu Surfers Paradise hets kei Hochhüser und au de MC fendsch ned. Das esch sehr agnehm. Byron Bay esch wörkli au sehr läss gsi. Vorallem hets en lässige Spaziergang (womer gmerkt händ, wie fest dKondition scho nogloh het vor luter nüt mache...) zume Lüchtturm gha. Underwägs hämmer sogar Wale gseh (also eigentlech nur dWolke öber ene) und en härzigi Scheltchrot. Dos au do ned eso vel Lüt gha het, hemmer spöter de Strand grad chli för eus gha.
Denn hämmer eus entschede chli Inland zgho. Als erst hämmer Lismore bsuecht. Lismore esch weder en krasse Gägesatz zude Küste. DStadt esch rächt verschlofe, vel weniger uf Touriste usgstellt und dur das hetmer sGfüehl, segi grad wohnlicher. Am nöchste Tag semmer wie alli Touriste auf Nimbin. Nimbin esch es offiziells Hippidorf und bout uf dem uf. Dlüt wo dete wohne send wörkli sehr vo dere Ziit brägt und läbed das so wies usgseht rächt us. De Ort bestoht eigentlech nur us einere Stross. Die esch zoimt vo Luuter chline, alternative Läde wod vom gfliessed Pulli, öber de Chrütli Tee bes zude sälbergmachte Guitarre worschiinli alles chasch chaufe. Was ned offziel chasch chaufe esch Gras. De werder deför offe uf de Stross abote. Mer händ au emmer weder rauchendi Lüt gseh und händ eus schonosochli gwundered, wie do dPolizei im Ort funktioniert und send am Schluss drufcho, dasses do worschiinli eifach legal esch, susch hetti dPolizei de ganz Tag nur scho uf de Stross zdue. Es esch es speziells und lustigs Erläbnis gsi und glich hetmer scho au sehr vel Liichene gseh, wo eim glich au chli nochdenklech gmacht het. De Ischlag hämmer denn grad ufe nöchst Tag metgnoh. Dete semmer em Nochberdorf anen Märt (de Wäg dohe esch wunderwunder schön gsi, öber grüeni Högle, verbii a wunderschöne Hüsli met blüehnde Gärte, öbis womer do en Australie wörkli ned vel so gseht). De Märt esch sehr gross gsi und fendet einisch em Monet statt. Nochem Motto (offiziel) make it, bake it, grow it, show it werd fliisig usgstellt. Mer cha vorwiegend Chleider, Schmuck und Pflanze chaufe, denäbe gets natürlech vel Foodstand und au mäng en Könstler wo sini Musig zum beste get. Es esch sehr en lebhafts Triibe gsi und mer händs beidi fest gnosse, au wemmer eus emmer noni als wörkli Alternativ bezeichne =).
Wiiter hämmer noch Grafton welle fahre, händ aber in Yamba en halt gmacht. Ufeme Camping wunderschön amene Fluss gläge hämmer denn grad zwoi Nächt halt gmacht und händ en ganze Tag met fulenze verbrocht. Nocheme churze Halt en in Coffs Harbour (wo de Russle Crow wohnt, mer händen leider ned troffe =)) semmer inland uf Armidale gfhare. Dstross het sech als erst grad mol uf 750 MüM ufeschlängled und esch denn sanf öber dHögle a drü lässe Wasserfäll verbiizoge. Dwelt do obe schiint wörkli in Ornig. Nur all paar Kilometer chunt es verschlofnigs Dörfli, wo hauptsächlech vom Bure läbt, es het do kei gross Läde sondern alles werd no vode Detailläde bestemmt, was wörkli sehr läss esch. Mer händs eus au ned neh loh enen Broki go stöbere. Aber dosie privat esch, esch alles mega tüür gsi, worschiinli het förde Bsetzer jedi noso verrosted Zange en Sammlerwert gha =). Mer händ underwägs au emene Hotel Zmettag gässe und dLüt händ eus durchus befremdend agluegt, weiss ned, ebmer do sovel Touriste kennt. SGebiet do heisst öbrigens New England und esch au weder mega läss. I glaube mer gfallt das Höglige eifach eso guet, velech au wellsmi chli a deheime erenneret (ned dasses be eus sooo höglig wär =)). Gschlofe hämmer die Nacht emene Caravan und send sehr dankbar för die Entscheidig gsi. So hämmer nämli es Heizöfeli gha und händ em warme chöne schlofe wäredem sech veruse de Morgefrost gleit het. Armidale esch uf 1000 MüM.
Am nöchste Tag semmer denn weder em ähnliche Stil ad Ostköste gfahre. Do Australie ned chönt ohni eri Beefpies sii, hämmers eus ned welle entgoh loh, i eini vode berüehmtiste Pieläde go Pie ässe. Die Piebäckerei macht pro Tag 50 verschedeni Arte Pies, wo vom tratitionelle Pie he bes zum Aprikose Huehn Pie füehrt. Es esch wörkli sehr lecker gsi, Mer händ beidi grad zwoi vernast =). Die Nacht hämmer in Port Macquarie verbrocht. De Ort esch berüehmt för dHafesteimur wo ganz vermoled esch. Sehr läss, aber au chli trurig gsi, well vel Stei a öber Verstorbnigs erenneret, die hämmer de amigs ned gföteled...
Em Moment semmer grad en Forster. Mer send wäred eusem erste Wwoofe schomol en Tag do gsi und es gfallt eus wörkli super do. dSTadt esch umschlunge vomene Fluss, wo vel chlini Enseli und Sandbänk het und sganze so en ganz spezielle Scharm het. Mer öbernachte do ufeme wunderschöne Camping. Lustigerwiis esches eine vode schönste womer je gsi send (und mer send emmer uf rächt schöne) und de belligst. Wells em Moment eigentlech kei Lüt händ, hämmer so för de Priis vomene normale Platz en Ensuite Platz öbercho, das heisst mer händ es chlises Hüsli meteme Bad för eus eleige.
Eusi Umrundig vo Australie esch somet eigentlech fast fertig. Am Mäntig hämmer meteme Kolleg en Newcastle abgmacht, en kennemer au vom Wwoofe en Glouster. Dete wämer denn am Obig en Footballmatch go luege. Mettlerwele hämmers scho es paar mol em Fernseh gseh und vestönd dRegle und send fast chli fasziniert vom Tempo vom Spel. So hämmer dänkt, dass müemer mol Live gseh ha. Abem vorussechltech Ziistig ziend mer denn ene WG fast em Zenter vo Sydney. Mer wärde dete meter Australierin undeme Araber zämewohne. Mer freue eus rächt druf. Be ene bliibemer denn gueti vier Wuche und händ so vell Ziit zum sAuto ready mache zum verchaufe, zum no einisch dStadt und dUmgäbig gnüsse, zum wedermol chli Sache eleige zunderneh (uf das freuemer eus wörkli auch =)) und denn au azfange packe.
Am Ziistig, 15.09.09 started euses Flugzüg am zäh vor achti am Morge rechtig Seoul. Dete freuemer eus uf vier Nächt emene schöne Hotel em Cityzenter und uf die hoffentlech lässi Stadt. Denn am Samstig, 19.09.09 landet euses Flugi am foifi en Frankfurt. Ergendwie esches ganz speziell weder vom heigoh zschriibe. Mer freue eus fest uf alli liebe Frönde und Familie und wössed, dass sAbentür dete weder wiitergot, grad so met Job und Wohnig sueche. Und glich wössemer scho jetzt, dassmer das Land met sine Wiitine und de lässige Läbensistellig werde vermesse.