on the road again

mer send wörkli scho weder underwägs.

am Donnstig hämmer sSprings en Bungendore verloh. Mer händ Ziit be ene wörkli sehr gnosse.

Sie händ eus es ganz es liebs und au wörkli schöns deheime botte. mer händ no es paar Föteli agfüegt vom Garte und de Arbet womer gmacht händ. (dPthalo chunt ebe es neus Studio öber und a dem hämmer au chli gholfe).

Denn esch aber Ziit cho und mer händ eus weder uf Zöcke gmacht. Zerst semmer no euses Auto för snöchste Johr go ilöse, das esch iwandfrei gange, was eus sehr gfreut het und no schnell mini Glasperle go abhole und wiiter ad Südküste. Fast zunderst semmer hämmer denn öbernachtet, en Eden =). Es esch sehr en ruhige Camping gsi und das hämmer definitv au mol gnosse. Vorgester (am Friitig) semmer denn wiiter uf Melburn.

Ufdem Föteli gseht mer chli de blaui Dunst, wo öberem ganze Tal vor Melburn gläge esch. Metlerwelle wössemer, dass das kei normale Näbel esch, sondern Rauch vode Buschfür. Das esch no fast echli gspängstig gsi. Am Friitig esches in Victoria (wo Melburn esch) weder sehr heiss gsi. Leider wössemer aber ned, ebsech dFür weder wiiter verbreitet händ. Höt rägnets emu chli, und hoffentlech stopt das sFür chli. Naja uf jede Fall hämmer 11 h brucht (met Pause) besmer entli de Camping rächt ede nöchi vom Center gfunde händ. De Camping esch ganz okay gsi, aber lustig esch gsi, dass zmetzt dure Camping e Starchstromleitig dure esch =), ede Schwiiz wördmer glaub so öbis au ned gseh, ufjede Fall hämmer bedi grad sofot Chopfweh gha =))) nei seich =). Naja a dem Obe hämmer den wörkli nömme vel gmacht. Eigentlech hämmer no welle Pancakes mache, aber sie send eus eifach ede Pfanne ene abrönnt und mer händ sie scho gar ned rächt vom Bode wägbrocht. Naja do hämmer den ufzmol au nöme soo hunger gha =) und en liebe Herr het eus denn erchlärt, dasses susch ufem Grill (wo do usere Blatte und ned us Stäb bestoht) ganz guet gieng. Also esches denn es Samstigzmorge Projekt worde, obwohl, es het be eus au ned ufem Grill klapped =) au die hämer ned chöne chehre. sÖl esch eigentlech ohni zhafte grad rechtig abfloss glofe und so hämmer die zwoi arbe Pancakes glich ned vom Grill brocht. Naja dhoffnig sterbt nie. De Teig hofft jetzt ufen gueti Teflonpfanne bem nöchste Camping =).

Nochdem dassmer de Grill de wieder putzt händ, hämmer eus den entschede, ed Stadt go zmörgele. Dete hämer dank Reisefüehrer au en Stross met vel härzige Kafis zum Zmörgele gfunde und händ eus es rechtigs Eierzmorge schmöcke gloh. Nochhär semmer wie rechtigi Touriste go die schöne Läde go aluege und sCentre und natürli hämmer au no en Verschnufpause em Royal Botanic Garden gmacht. Zum Znacht hämmer eus denn no en feine Hotdog (ich met Surchrut, mmmh) gönt und send müed weder zu eusem Camping zrugg cho.

Jetzt semmer underwägs, de Südküste noche. Mer händ jetzt e gueti Wuche Ziit bes noch Adelaide zcho. Vo dete got denn, so Gott will und alles klapped, am Sunntig enere Wuche e Fähri uf dKangoroo Island, womer am Mäntig enere Wuche weder afönd Wwoofe. DFamilie het en chline Zoo, en Garte und es Beachhus, wo mer döfe dinne wohne. Mer händ Föteli gseh, wo mega schön send. Naja hoffemer es werd guet.

Danke vel mol, för all die liebe Up-dates womer emmer weder öberchömed. Mer freue eus emmer fest öber News vode Schwiiz.

zuhause bei elmer fudd

scho weder esch en Wuche ume. Ziit got fang raecht rassig dunkts mi!

Aber zertst mueni no schnell en chline Nochtrag mache:
Ich ha jo letzt mol gschrebe, dass euses Auto Marta heisst und en Blache sowie en Felge ufem Dach het. Naja eigentlech haemmer extra no es Foti dodezue gmacht. und voila, do waers (merkeder i schriibe ufere Englische Tastatur, muehsam =)) Ah jo, dMarta het jetzt au en Radio wo funktioniert; vo eus sälber ibout. Esch no rächt lustig gsi, obwohlmer shalbe Auto händ muesse usenand näh. Metlerwile semmer au em "Pink Slip" (das esch enard e Vigniette, wo bezügt, dass sAuto för es Johr iglöst esch) nöcher cho. Mer händ sAuto enere Garage vorgfüehrt, und das esch so gange: de Garagist het zerst mol alles Liecht agmacht, denn hetter dMotorhube ufdo und gluegt eb dBaterie setzt. Denn hetter dRäder agluegt (aso ned Pneus...) und churz en Blecke unde ine gworfe (sAuto aber ned ufe Lift gno oder so) Denn escher no schnell en Rundi go fahre metem und het gluegt eb Brems got (emmerhen hetter das glich no meteme Grätli testet). Denn no schnell zwoi mol an Usbuff anegenged und voilà. Es esch durecho =)). Naja es esch deför jetzt au chli erschreckend, wemmer öberleit, dasses jensti Autos uf de Stross het, wo jöhrlech ned besser kontroliert werde... Naja

Settem Maentig wohnemer bem Phil und de Pthalo Spring. Sie send es aelters Ehepaar (so um di 60gi) und woerkli super.
DPthalo (seitmer Seilo und das esch ere Kuenstlername. Pthalo esch die gruen Farb womer gseht, wemmer vode siite dures dicks Brilleglas durelueg...) esch sochli em Mama. Sie esch raecht oebergwechtig und emmer sehr froehlech und lut. Natuerli chocht sie super, und mer choemed fast ned usem aesse use. De Phil esch sehr doenn (weiss au ned gnau, wiener das macht, be dem aesse =)) und au sehr naett, aber au seeehr sehr lustig. De Michi chasich amigs fast noem zruggha. Er werd ebe au liebevoll Elmer Fudd gnennt, weller em Garte amigs duet Hase schuess, oder bessergseit wett. Er ned sGwehr und tegered andersch ume, beser denn en Has fend, wonem de aber ned raecht vor dLense chunt, und wenn scho, de treffter secher ned =). Anschinend zieht sGwehr uf links. Die zwoi send woerkli sehr lieb und fuersorglich. Euses deheime do esch sehr schoen und suber. DPthalo schaffed ned, sonder esch eifach em Garte oder e erem Studio. Sie moled sehr schoen, oder verarbeitet Glas. Woerkli sehr laesses zueg. De Garte do esch resig. Eigentlech waendsne gaern oeffentlech mache, aber das esch no eher es fernes Ziil. Aber foer eus heisst das, dassmer woerkli fast nur gartearbet mached. Guesse, floecke, jaette, Roseschniide, Gmues imache und so wiiter. Es esch eigentlech woerkli no ganz laess und easy. Macht sogar mehr chli Spass =). zum Zmettag luegemer emmer en Film (das esch anschiinend Tradition do) und denn got dPthailo es Bett und mer gnuessed chli dRueh und sschoene Wetter. Met eus duet no en Duetschi metwwoofe, aber sie esch chli en spezielli, sie weiss alles besser und das no met 27i =). Naja, saelbst i diskutiere fang noem so vel met ere...

Am Donnstig morgen semmer am halbi saechsi uf und send ufe Hoger henderem Huus klaettered und haend vo dete de Sunneufgang bestunded. Sehr schoen gsi, Sogar Kaengurus hemmer gseh, aber die Cheibe brengtmer glaub eifach ned eso guet ufs Foetli... (ha aber extra eis agfüegt för de Sämi =)) Am Obe semmer met ene zum Vegetable Club metgange, sehr en lustige Alas! Dete treffed sech mehreri Paar plus minus e erem Alter und trenked Wii und aessed Chaess zaeme. Vegetable Club esch uf das begrenzt, dass oeber esch go vel Gmuess ichaufe und die vo de andere abkauft werde =) aber es esch aso woerkli sehr en lustige und gsellige Obig gsi, wenner au nur bes am halbi nueni gange esch, schliessli muemer am noechste Tag jo go schaffe =). Am Friitig am Morge haemmer en Blue Tongue (Blau Zunge) gfunde und ich hasi gschnell doefe hebe foers Foti =)

Gester semmer met sSprings ine rächt lässi Gmeind gange uf Camberra. Es het eus wörkli rechtig guet do, wederemol ed dChele zgo, heicho. Leider esch dPredigt ned emol so eifach gsi sund de Michi aber au ich het ned eso vel metöbercho. Aber de Worship esch cool gsi. Nochher semmer szwoite nochli go Camberra unsecher mache. Mer send enen Sculptur Garden go laufe, go dGlasworks (a Glasbloeserei, wo aber nur a Könstler vermietet werde, also ned woerkli e Produktion het wie Hergiswil) go aluege. Dete hanimi de chöne iischriibe för zum Glasperlerli go mache. Mega cool gsi, wörkli. I ha dLehreri för 20 min för me gha und se hetmer sochli zeigt und gmacht. Schlussentlich hani 3 Perleli gmacht gha. Naja wunderschön sends secher ned, aber mega e cooli erfahrig esches gsi. Sie mached jetzt met no es paar anderne anschiinend es Cheteli und ich döfs am Donnstig go abhole. Anschiinend bruchts ebe au no es Ziitli, bes sGlas troche esch, und am Mo und Di schaffes zudem au ned. Jonu, somet wössemer au, dassmer solang ned wäg gönd =)

Mer haend eigentlech nochhaer (so ab Endi noechst Wuche) uf Vicotria wele und dete bede Buschbraend go haelfe ufrume. Aber es schiint, dass das sehr vel gaern woerde und dass eifach ned eso vel bruched. Naja mer haend eus jetzt oebers Netz emol beworbe, und waer weiss, velech gets jo glich es Plaetzli foer eus, wenn ned goemmer halt eifach wiiter.

Ganz vel liebi Gruess vom weder Sunnige Australie. mer vermesse euch alli!

let's introduce you to...

nochere rächt churze Wuche, aber deför rächt en nassi, eher langwilige Wuche mäldemer eus scho weder.

Die letzte paar Täg semmer wörkli eifach chli em umchreis vo 130km rund um Sydney umekurft. Send e verschedene Städt gsi, wo aber alli zemli ähnlech gsi send und händ vorallem glädelet (ohni wörkli öbis zchaufe) und chli speli gspelt.

Aber gester hämer chli meh erläbt. Mer send zerst inen Zoo wos Koalas gha het und Wombats ,Wollabi (oder so =)), Kängurus und Krokodil. DKoalas hämmer sogar döfe go alänge und för 10AUS es Foti mache, naja uf das hämmer denn verzechtet, deför hämmer au no en Schlange, wosech agfüehlt het wiene Handtäsche gstrichelet. Das het wörkli no so Spass gmacht. Zude Kängurus hettmer au es Ghäg chöne (oder fast müesse, sesch hende dra no wiiter gange) und das esch fast echli gförchig gsi =) die send so chli meh als en meter höch wenns hocke und chömed eifach chli uf de zue =). Aber mer händ eus denn näbem vorwetzigste duregschleused und send no d'Vögel go aluege.

Nochhär hämmer eifach ned rächt gwösst wamer wänd mache und do de Michi scho fäng e rechti Matte ufem Chopf gha händ, hämmer dänkt mer gönd zum Coiffeur. D'Frau Bume muemer jo nie öberrede, wenns umen neue Hoorschnett got =). So semmer en nöchste Coiffeur ineglofe und händ mol gfrogt ebs en Termin händ. Noch 20min warte (womer chli send go lädele) semmer denn dracho. Naja, bes mini Vorbesprächig duregsi esch, het de Michi scho en neui Frisur gha. Aso jo, so neu esch si zwor ned gsi. Er het sie zwor nonie gha, aber jetzt esi eifach sochli biider. Obe land und schön abgstuft bes unde churz. Also das, wo 80% vo allne 30-40 jöhrige Manne händ =)

Îch ha stolzi 3h gha, bes mis Wunderwerch volländet gsi esch =). De Michi esch denn metlerwile mol zrug zum Campingplatz. Jetzt hani 3 verschedeni Mäsch und en Pony, aber das gsender jo sälber =).

Zwoite womer euch gärn wend vorstelle esch eusi MARTA, euses Auto. De Wunderschöni Name esch us zwoi Wörter entstande: MAria (die lieb Dame bem RTA) und RTA. Sie esch mettlerwile scho wörkli ganz guet Iigrechted. Hendeuse hets zwoi 1.2om langi Boxe ,womer wörkli fast alles euses Züg dri brengend. Vo de Oberflächi vom Bett chamer ganz hende au no vo Obe zu zwoi "Gheimfächt" (wellmersie ned gseht, wennd Matraze drof esch) zuegrife. Denn vo de Hendersetztörene chamer zu zwoi Fächer zuegrife, wo seinte eusi Chuchibox und sandere so dGrömpelchamere esch.

Neustens het dMarta jetzt au no es Blachetach, womer be Räge und starchem Suneschi cha drundersitze. Ufem Dach esch no zerwähne: die grüen Blache enthalted alli eusi warme Chleider, womer die letzt Wuche herzlich vermisst händ, aber doch zfuhl gsi send zum abehole =) und en schön verchromti Felge, womer de Pneu be eusere letzte 4x4 Fahrt kaputt gmacht händ (het aber glich Spass gmacht =))

Am Mäntig fangemer weder a Wwoofe, leider ned ganz be eusere Lieblingsfamilie (wosech erst gester gmolde het, ond mer hett chöne go, aber halt de andere scho zuegseit händ...) aber mer dänked es werd glich flott. Mer händ emu scho Föteli öbercho, vode Gurke wos gester iigmacht händ =))).

So, denn machemer Schluss, uf dem Camping hämmer "nur" 2h Free Wireless Internet pro Tag.

Campingfieber und -fettnäpfli

Mer höckle jetzt grad enere sehr schöne und moderne Campingchuchi vomene wörkli sehr schöne Campingplatz in Goulburn. Noch es paar spezielle Nächt, gnüssemer wörkli chli die Exklusivität vo do.



Mer händ bes letzte Mittwoch em Barrington Outdoor Adventure Centre gschaffed. Eigentlech gets aber dete dröber nöm mega vel zbrechte. Mer händ dHundehöte ferig gmacht und au susch glaub en guete Idruck henderloh. Leider send eusi Campingsache aber erst am Donnstig morge acho. So hämmer halt erst am Mittag rechtig Barrington Tops National Park ufbroche.



De NP esch wörkli sehr schön. Rächt höchi Högle, voll met feinschmöckende Pflanzene. Mer send rächt wiit inegfahre und händ am Schluss en 4x4 Schrecki gno, wo steil obenabe gange esch und mer wörkli fast echli Angst gha, dassmer do nie meh ufechömed. Unde am Wäg hets aber echli Platz gha, grad näbeme schöne Bächli, wo halt eifach ned eso vel Wasser gfüehrt het, und dete hämmer euses Auto parkiert. Mer händ en churze Schwumm gno und denn welle de Chocher und dGaslampe be Liecht usprobiere. Aber, us unerchlärleche Grönd hammer eifach kei Gas us dere Fläsche brocht... Mer händ wörkli alles Probiert, jedes Schrübli glockered, jedi Möglichkeit usgmertzt, aber mer händs eifach ned gschafft. Also hämmer halt doch es Füür gmacht, obwohl dass ede NPs eigentlech ned erlaubt esch und em Moment, wells eso troch esch, au wörkli chli gföhrlech esch, aber mer händ eifach schön met Stei abgrenzt und au nur es chlises gmacht. So hämmer emu emmerhen öbis zösse gha.



Am nöchste Morge semmer denn, danke de tapfere Marta (so heisst euses Auto) weder secher zum Brian und de Naomi cho (mer händ vo ene no en Detailcharte vom Park öbercho und die müesse go zrugg brenge). Dete hämmer denn au no grad euses chline Gasproblem agsproche. Nocheme churze Lache het eus de Brian denn erchlärt, dassmer Gasflesche jo direkt bem Hersteller kauft händ und no hette müesse go uffölle, bevomersie chöne bruche. Er esch denn aber so lieb gsi und hetsi eus grad vo sim grosse Tank ufgföllt.



Denn semmer wiiter uf Newcastle, zum Craig, en Kanuguide. Mer händ denn dete met em, eim vo sine WG Kollege (en schwule Schniider) und es paar Kollege gmüetlech es VEGI-BBQ gnosse. Mer händ dete wörkli au nomol es paar Tipps för eusi Reis öbercho. Am Schluss vom Obe semmer denn eleige met 2 Schwule Päärli dete ghocked und händ nochli plaudered. En echt spezielli Erfahrig. Eigentlech sends wörkli sehr nätt, aber wörkli au sehr typisch gsi. De Teechruegwetz wär absolut abrocht gsi. Naja aber woni denn emol ufs WC be, händs de Michi chli afo amache, und denn esches för en rächt schnell verbii gsi met de Sympatie. Mer send denn au es Bett =).



Vo Newcastel semmer wiiter ed Blue Mountains. Dete hämmer ufeme chline, aber glich gmüetleche Zeltplatz öbernachtet und händ am nöchste Morge welle die Three Sisters und susch chli Touristeattraktione go aluege. Mer händ zum Biispiel gärn welle meteme Bähnli es Urwaldtal abefahre und dete uf Rollstuelgängige chli umewandere, aber womer dPriise gseh händ, esches eus de glich fast echli vergange, und mer händ eus uf das wo gratis gsi esch beschränkt =). Aber au so hämmer chli chöne laufe und die schöni Natur gnüsse.



Spöter semmer denn wiiter gfahre, as andere Endi vo de Blue Mountains, en Kanangra Bloyd NP. Dete hämmer ufeme Zeltplatz öbernachtet, wo aber nüt kostet het und au nur es WC und Rägewasser gha het. Nochdem dassmer aber sWC inspektiert händ, hämmer eus entschede, dassmer, wenn nötig, au noimed hendere Busch chönt =). Mer händ denn au dete eusi Chöcherlisache uspackt (wo met Gas alles super funktioniert) und händ agfange choche. Dos ganz en heisse Tag gsi esch (ca 44C) send, send uf zmol tusig floige verwached und es esch en rechtigi Plog gsi. Mer händ eus denn wörkli müesse dezue entscheide, es Auto go ässe, dassmer ned total ploged wärde =).



Wos de Dunkel worde esch, send zwor dFlüge wäg, aber wörkli vel Möggli cho, wo au met Antibrumm und Roicherstab ned hesch chöne verschüche. So hämmer eus entschede, trotz früeher Stund, eus go wäsche und es Bett zgo. Und uf zmol Höpf es chlises härzigs Känguruu usem Busch uf eusi Reste, womer chli wäg gleert händ, zue. Es esch denn ede Dämmerig dete gsi und het fast ohni eus zbeachte dete chli gässe. Es het sogar zuegloh, dassi öbe 10x probiert ha ens zfötele (met Bletz) beses denn so ungefähr klapped het =). Denn semmer eigentlech scho go schlofe und am höt morge früeh uf. Höt morge semmer denn nochli go laufe (es het dete en anschiinend en schöne Wasserfall gha, wo aber soguet wie troche gsi esch =(( ). Denn semmer scho weder chli wiiter gfahre. Mer händ dänkt, mer nämed lieber 4x4 Strecki, well die nur halb so lang esch, wie die rechtig Stross. Naja, es esch de aber so krass 4x4 gsi, dassmer 2.25h gha händ und eus am Schluss au no rächt verfahre händ, wells em Busch usse vel meh Strosse gha het als uf eusere Charte =) und glich semmer denn so em früehne Nomittag do en Goulburn acho und gnüsse au weder chli de Luxus, oder Tatsach, dassmer chöned Wäsche =)



Mer sueched jetzt weder en Familie zum Wwoofe, domer no 2 Wuche en New South Wales müend bliibe, wellmer sAuto no müend vorfüehre und das natürli nur do chöned. Mol luege, womer wärde lande, es het uf jede Fall es paar cooli und interessanti ume do ede Region.



Wiener secher scho ghört händ, send do en Australie (en Victoria, so um Melburn) resigi Waldbränd usbroche und zerstöre vel Land, Hüser und au scho jensti Menscheläbe. Es setti wörkli unbedingt weder afo Rägne. Obwohls höt ned eso warm gsi esch und zwöschedure scho es paar mol tröpfled het, muesses wörkli wedermol so rechtig Rägne, dass sech dSituation entschärft. Danke vel mol för a das dänke!



Mer freue eus uf all das wo eus ede nöchste Ziit erwarted und freue eus au, euch chli dröber zbrechte.