Australia Day ond Hundehötte

Die Wuche esch eigentlech ned emol so prikelnd interessant gsi =) Mer händ vel gschaffed, sesch emer schön heiss gsi (nöchst Wuche wots emmer min 35C und am Wuchenend denn 40C) und glich hämmer es paar cooli Sache erläbt.

Am letzte Mäntig esch Australia Day gsi, also de Nationalfiirtig do. Grundsätzlech machtmer glaub ned vel, es het eus en Verkäuferi gseit, dassmer sech nur döch komisch alege, es Barbeque mache und vel Alcohol drenke. Do mer aber au ned händ müesse schaffe, hämer dänkt, chöntemer jo en chline Tagesusflug mache. Mer händ dNaomi gfrogt, eb sie eus öbis chönti entfälle und sie het eus ad Ostköste gscheckt. Es esch eigentlech fast snöchste, wod glaub öbis chöntsch mache, muesch aber glich 1.5 Stunde Autofahre bes wörkli dete besch. A die Distanze müemer eus wörkli nochli dragwöhne. So semmer also es Küstestädli Forster gfahre. Naja wörkli chli schad esch halt, dass dur das die Städt alli noni elter als so 120 Johr send, seigentlech ned wörkli schön send (bes jetzt hämmer emu nonie es härzig Städli gfunde, wie mer sie so kenne). Dete hetmer denn dAustralieeuphorie schochli gspürt, sehr vel Lüt send uf de Strosse gsi. Mer het öberall vel lustigi Hüet, Chleider, Schmenki und Fahrzüg gseh. Zudem send grad die Junge au scho Alkoholmässig rächt em Schuss gsi, und das am 11h am Morge. Jonu, wells aber eigentlech ussert em Hafe ned eso vel zluege geh hett, semmer halt nochli go shoppe (en beschäftigung wo selbst mich noch zwoi Wuche "Weldniss" erfreut =)).

Nochhär semmer ade Meerköste noch rechtig Süde gfahre, händ sogar meter Fähri öberen Fluss müesse und send denn anen resige Strand cho, wommer döf met 4x4 druffahre. Domer jo so eine händ, semmer fröhlech druflosgfahre, emu die erste 100 Meter, denn semmer scho stecke blebe =). Mer händs denn bener andere Uffahrt es paar kilometer wiiter unde no einisch probiert und dete met ach und krach gschafft. Aber bem vom Strand abefahre hämmer en chline Hoger ufe müesse und händ def. es paar mol müesse probiere, besmers gschafft händ. Dassmer ufem Sand au met 4x4 muess Luft us de Reife loh, händs eus erst spöter deheime gseit... aber jetzt wössemers förs nöchste Mol. Mer händ denn aber no en Leguan gseh, so rechtig live und das het de strapazierte Närve rechtig guet do.

Gester esch rächt en schwerige Tag gsi. Mer send dra en grossi (jetzt scho bereits grüeni) Hundehöte zmache. Die Hundehötte setti ufes Podestli amene Hang a cho. Vorgester hämmer im Angsicht des Schweisses, de Hang abtreit und vier Löcher pudled, womer denn hette selle Metalpföstli ibetoniere. De Brian het eus mol so mache loh und mer händ au mol so gmacht. Schlussändlech send die vier Pföstli schöne em Wenkel und Wasser ibetoniert gsi, nur, de Beton het ned gha, wellmerne met zwenig Wasser agrüert händ. Also hämmers ebe gester no einisch müesse mache. Scho liecht missmuetig hämmer eus denn as werch gmacht. händ nomol öbe en Stund usgmesse, dasses weder stemmt (de Brian het natürli achtlos die ibetonierte Pflöck usgresse, zum zeige dass de Beton ned hebt, dasmer am Tag vorher aber ergend e Stund gmässe händ, dass schön em Mass send, hetter natürli vergässe). Sobald denn alles weder gstumme händ, und mer met helf vo Metalstangene azeichnet händ, wo dPföstli weder hechieme, hemmer de Brian gholt, zum Beton arüehre. Er het eus denn da lieb erchlärt und es Locht biispielswiis igföllt, dodebi heter natürli eusi süberlich platzierti Stange wäggleit, super. Aber ned gnueg neinei, er het den sPföstli eifach ergendwoh dribetoniert und gseit, mer selled denn die andere deno usrechte. Das esch denn leider nöm gange. Jonu jetzt werd das ganze halt au wiederhin chli en bastel. Mer gänd eus aber natürli müeh, dass dHönd am Schluss es schöns deheime händ.

Aber domer bedi wörkli dur das chli ranzig gsi send, hämmer dänkt, wärs velech gar ned so schlecht, wemmer chli wäg gienge zObe. Dos aber do kei schöni Restaurants get und au susch nüt zum Mache hämmer euses Auto packt (de Usbou esch leider emmer noni ganz fertig und mer händ au müesse en Matratze und so uslehne) und send weder a de Beach womer scho am Mäntig metem Auto druf gsi send zrugg. Dete hämmer gester obe wörkli sehr en schöne Obe gha. Es esch en resige Strand (wörkli mehreri Kilometer lang) und mer send eigentlech ganz eleige gsi. Es send em ganze zwoi Autos schnell a eus verbii gfahre und susch hämmer nur Meer und Mövene gseh. Mer händs wörkli sehr gnosse. So hämer denn au dete gschlofe, händ en wunderbari Morgesunne gnosse und es Bad am halbi sebni am Morge.

No öbis cools zu de Camping Sache womer jo no bruched. Do de Brian es Gschäft het, chaner grad direkt bemene Grossverteiler bestelle (so quasi als Verkäufer) und dur das chömemers zum Achaufspriis öber. Das spart eus einiges und do mer do för dÖberstunde zahlt wärde, hämmer au scho einiges Abverdient, was natürli grad nomol cool esch.

Höt obe esch sFinal Federe-Nadal, womer natürli als Stolzi Schwiizer werde luege.

Ou jo, vorgester semmer bemene Schwiizer deheime gsi, wo uf Australie usgwanderet esch. Esch wörkli ganz en liebe gsi, er hets sech do wörkli es Paradies ufboue (schöns, selbergmachts Hus, grosse Garte, kei Nochbere, und alles esch wunderschön grüen, do wachst au sHanf wunderbar, woner und de Brian de ganz Obe vernechtet het =))

Es got eus wörkli guet do, aber mer send gar ned so undankbar dassmer nöchst Wuche de au weder wiiter gönd. Mer händ emol planed, dassmer am Friitig zumene Kolleg uf Newcastle gönd (hoho, mer händ scho Kollege do =)), und denn wiiter es paar Täg ed Blue Mountains go wandere und den wiiter uf Canberra und Melburn, aber mol luege, was denn wörkli alles so klapped und was de weder ändered =)

Schön, dasser eusi Iiträg lässed und danke vel mol au för die liebe Update-Mails vo deheime. Mer vermesse euch aso definitiv chli.

Kulturschock

Au de muess früehner oder spöter cho, velech esches jo super, dasser scho jetzt chli dure esch.

Mer send wie bereits mol gschrebe be eusere erste Wwoofing Family. Do chönemer för Chost und Logie schaffe.

Eusi Wwoofing Eltere heisse Brian und Naomi. Sie send so zwesche 35-45 und eigenltech wörkli nett. Sie händ es eiges Gschäft wos Kanu- und Mountain Bike Toure abüte. Das heisst, sie händ en resigi Garage met Kanu und Bike Utensilie. Es chömed fast jede Tag Lüüt wo gönd go Kanu fahre, mängisch gfüehrt, mängisch aber au eleige.

De Michi werd do vorallem als Schriiner und Handwerker brucht. Sie händ bes jetzt no kei Rezeption gha und dKunde send eifach ed Stube ine glofe. Das sell sech ändere. De Brian het scho einiges gmacht, före Michi send vorallem Moler und chlini Schlussärbetli öbrig blebe. Zudem escher jetzt anere neue, grosse Hundehöte dra =). Ich due vorallem vel abwäsche, wösche, chli Gartearbet, Autowäsche, und so chlini Sache wo eifach niemerd Ziit het deför. Mer schaffed ca 4-6 Stund am Tag. Alles wo de Michi meh schaffed, chömemer nochli Sackgeld öber, das esch schono super. Met eus zäme düend no zwoi Dütschi Girls wwoofe. Met ene hämmers eigenltech wörkli sehr guet. I glaube sie gnüsseds, dass wederemol för länger met öberem chöne dütsch rede =).

Was wörkli au sehr cool esch do, esch, dass mer Platz und Werkzüg händ för euses Auto uszboue. De Brain het eus för eusi Öberziit letzt Wuche Holz bsorged und mer händ gester und höt eusi zwoi Freitäg und chönd do chli wärchle, dasch genial. Obwohl ebe, do chömed denn die kulturelle Underschede wörkli fest use. So es chlises Biispiel:

Mer wössed sett länger, dassmer gester euse Freitag wärde ha, und dassmer au euses Auto denn werde usboue. Mer händ das wörkli jensti mol ergendwie bemerkt. De Michi het au mol em vorus metem Brian dröber gred, eber vo em cha Holz abchaufe, und das esch alles okay gsi. För eus esch klar gsi, mer stönd am halbi achti uf und fanged am achti a werche (grad bede Garage metem Material denne). Gester morge denn hets uf zmol gheisse, dassmer anders Holz müend neh, de Brian döchs aber för eus organisiere. Das esch schomol secher bes am halbi zähni gange. Und aha, wägem afo schafe, es chömed höt morge denn no zwoi Gruppene go Kanufahre wo no ed Garage müend go eres Züg usehole. Mer send wörkli sehr erstund gsi. Jetzt redmer scho so lang defo und niemmerd seit eus das. Mer händ denn ede grösste Hetz (ca 42C) am 12i chöne afange. Das esch öbis womer wörkli no ganz fest müend lerne. Die Australier plane eifach eigenltech fast nüt vorus. Das heisst alles esch spontan, för eus organisierte Schwiizer wörkli ned eso eifach. Aber au ned eso schlemm! Höt morge semmer echli spöter ufgstande, händ euses Tipi, womer dene schlofe, chli ufgrumed und nämed alles gmüetlech, wellmer wössed, vorem 12i lauft eh nüt met schaffe =).

Gester Obe hämmer euse ersti klischeemässig Australieobe gha. Und es esch mega gsi. De Brian und dNaemi händ nochli Bsuech gha und mer send alli uf de Veranda usse ghängt, händ chli plaudered. Es Gwetter esch ufzoge, die ganzi Umgäbig esch emene wunderbare gäll erschene, so rechtig märlimässig. Es het a gfange dröpfle und es het emmer weder wunderschöni Bletze gäh. De einti Bsuech het nochdems chli dunkel worde esch uf zmol en Gitarre förezaubered und afo bluese. Es esch eifach wörkli so en rechtig cooli Stemmig gsi, i cha das glaub met Wort gar ned eso erchläre, aber mer händ wörkli sehr gnosse. Das esch die wunderschöni Siite vo Australie.

vom Autochauf und Sunnebrand

Mer send jetzt echli meh als e Wuche em Down-Under und händ höt Sydney verloh, aber de Reihe noch.

I de letzte sebe Täg hämmer eigentlech gar ned so vel gmacht, und glech vel erläbt. Nochere Wunderschöne Wanderig, woni em Blog gschrebe ha (und au sFoti devo esch) hämmer eus uf Autosuechi gmacht. Am erste Tag hämmer zumene Backpacker-Automärt welle, womer dete acho send (zFuess und met Bahn natürli) hets dete es Scheld gha, metere Charte woner neu esch. Do er grad um de "Egge" gsi esch, semmer mol zFuess druflos und noch öbbeme halbe Kilometer weder zrugg go Karte fötele, wellmer scho kei Plan meh gha händ womer send, und womer döre müend =) Das esch eus ede letzte Täg öfters passiert. Distanze send eifach resig, nur scho ede Stadt ene. Naja de Automarkt het sech denn nur als Umschlagplatz usegstellt, sueche und verhandle muesch öbers Internet. Mer send aber metere Garage es Paar Autos go aluege. Gha hets aber nüt. De Tag esch aber so guet wie gföllt gsi =). Mer händ denn no e Zitig kauft, wos nur Auto zum Verkaufe denne het. Dete hämmer gmerkt, dass mega vel Garage am Hume Highway send. Also hämmer eus am nöchste Tag per Bahn as Endi vo dere Stross gsetzt und send nocher zFuess öbe zwoi Stund dere 6-Spurige Stross Entlang glofe, be scho rächt heisse Temperature. Mer händ zwor vel Autos gfunde, aber leider ned e eusem Budget, deför hämmer de Tipp öbercho, dass ada Parramata Road (au en Highway) belerigi Autos het. Also semmer am Tag drü, be gfüehlte 42C dere Stross entlang glofe. Aber zum Glöck ned so lang. Scho noch es paar Minute heschs gfüehl gha, dassdi dHetz erschloht. Churz bevormer denn weder händ welle go, scho Total verschwetzt, (am Tag vorhär semmer no a Bondi Beach go sunnele und händ trotz starcher Sunnecreme und nur ca 1.5h dete sii, bedi en Sunnebrand gha (de Michi nochli stärcher) und send dorum eh ned eso Sunnefroidig gsi) hämmer denn entli euses Auto gfunde, en Mitsubishi Pajero V6 3000 (meteme 120 lt Tank, zwoi Ersatzräder, Tachstender, obe grosses Dachfenster, Klima, 4x4, und Asugschnorchel, aso so rechtig am Michi sis Traumauto, obwohl, de Cheufänger fehlt=)). Mer händ denn am nöchste Tag, gester, de Chauf abwecklet und send metem Sohn vode Garage es RTA, em Strosseverkehrsamt vo Australie. Dete semmer 2 Stunde gsi und händ so de typisch Bürohorror erläbt. Nochdemer es Nömmerli zoge händ und entli dracho send, het eus de netti Herr am Schalter klar gmacht, dass em dHänd bunde seged, wemmer kei festi Adresse händ in Australie. Also semmer weder gange, händ es nois Nömmerli zoge und metem Garagist gred (zum Glöck esch de Sohn debii gsi, das hets för eus sehr vel eifacher gmacht!). Er het de gfrogt ebmer Frönde händ, womer chönte ageh, leider hämmer das noni. Also hämmer e euser verzwiiflig em Camping aglüte und gfrogt, ebmer en döfe ageh. Zum Glöck het de klapped. Die nöchst Lady, d Maria, het denn aber gseit, dass das ned gieng. Mer händ denn chli metere Diskutiert und sie esch de Chef go froge. Er het denn es Formular före zaubered, womer händ müesse underschriibe, dassmer Backpacker send und de Camping för eus Post sammled. Denn, entlech het dMaria chöne afange met registriere, aber Achtung, de Strossename het gar ned metem Ort ufem Beleg vom Camping zämegstumme, und au dAutonummer wo am Auto gsi esch, hetsi em System ned gfunde. Naja nochdem denn au die Problem behobe gsi send, semmer denn definitiv Bsetzter vo dem Auto gsi.

Jetzt semmer grad underwägs vo Syndey in Norde uf Gloucer (oder so) womer serste mol als Wwoofers werde schaffe. Aber vo dem Schriibemer snöchste mol.

Ade

Guet Flog und Kakerlakenpoker

Welcome to Australia

Mer send acho, eigentlech jo scho vor 2 Täg =) dReis esch eigentlech wörkli guet glofe.

Nochdem dassmer vo de Chrege und em Siri uf Basel gfahre send, semmer nocher per Bahn uf Frankfurt gfahre. vo dete semmer de metde Koreanair uf Soul gfloge. (de chlini ersti Wehmuetstropfe a deheime, sFlogzüg hett Tuppi Farb gha)De Flog esch eigentlech sehr ruhig und agnähm verlofe. Eifach das metem schlofe het ned rächt welle klappe... De Michi hets gschafft, zwöschedure mol chli zdöse. Ich be eigentlech die ganz Nacht demet beschäftiged gsi, en bequemi Schloflag zsueche, gfonde hani si ned. dSoul hämmer denn en 6 Stöndige Ufenthalt gha. de grösst Teil defo hämmer enere "Rest area" verbrocht, wos so bequemi grossi Stüehl dine gha het. dete hämmer beidi chli chöne döse. de zwoit Flog Sydney esch chli unruhiger gsi und vorallem au voller, aber mer händ die säb Nacht beidi chli chöne schlofe.

De Aflog uf Sydney esch sochli en entüschig gsii: En grossi Wulcheschecht, sowiit wies Aug glängt het. Höt esches eigenltech serste mol wörkli schön, susch esch emmer sehr wenig gsi. sGfröhrlibörli het emmer en Jagge agha =))

De Camping womer denne send esch eigentlech ganz okay, er esch schön ruhig und sBungalow esch eigentlech schön gross. Es esch eifach ned eso suber, au sWC ned, und das esch zwor ned mega ungwöhnlech, es werde secher no schlemmeri folge, aber mer müend eus wohl chli adas gwöhne. Aus eusi erste Wildtier erfahrige hämmer do gsammlet.

Schöni: dVögel do töned ganz andersch. Es tönt Zoo und das esch u cool, so gsehtmer, dassmer wörkli nojmed andersch send.

weniger schöni: die erst Duschi hani grad mol metere Kakerlake gno =) ned dasses mega schlemm esch, aber mer luegt de scho, dassi ned rechtig Chleider chräsmed.

Die letzte zwoi Täg hämmer vorallem schlofend verbrocht. Dur das semmer höt zNacht am eis beidi hellwach em Bett gläge. Mer send de uf go Speli spele und händ uf zmoil 3 Schabene entdeckt. Die erste zwoi hämmer (also min Hero, de Michi) de sorgfälltig veruse do. Die drett hetter den metem Schlarbe welle erschloh. Leider hetter de Kampf verlore. dNochberi het eus höt am Morge aber gfrogt, ebmer e Spenne denne gha hebed, es heti so poltered am halbi drü am morge =).

Es got eus wörkli sehr guet do. Mer hocked em moment grad em MC am Bondi Beach, met gratis Wireless (danke Silve för de wertvolli Tipp) und gnüssed dSunne und de Beach. Spöter laufemer de no a de Küste noche chli Südwärts.

Mer händ jetzt au en Australischi Natelnummer 0061 (0)420854115. Am Michi sini esch ab sofort nöm en Betrieb.

Ade, bes zum nöchste Mol

Vorbereitig und Reisefieber

So, die letzte Vorbereitige send so guet wie abgschlosse, e guet 48h werdemer in Frankfurt abflüge. Wow, Ziit esch jetzt wörkli grast. Ede letzte zwoi Wuchene hämmer usserd a diverese Familiefester vel gässe, au all eusi Sache definitiv verpackt, händ dWohnig in Boju putzt und abgäh, händ eusi zwoi liebe Autos verchauft und send bem Michi sinere Schwöster und Ma, de liebe Chrege und em liebi Siri izoge. Send gueti aber au intensivi zwoi Wuchene gsi. Uf de Föteli gseht mer susch no eusi liebevoll "1-Zimmerwohnig" gnenntig Box, womer euses Inventar dri verpackt händ. Grössi: 2m x 2.5m x 2m.

Am Sunntig, gester, send ganz vel liebi Lüt uf bsuech cho und händ sech vo eus verabschedet. Sehr en läse Tag! Obwohl eus de Chopf am Obe zönftig brummt het, hämmer die liebe Gspändli nomol so rechtig chöne gnüsse =).

Höt hämmer denn no so die letzte chline Sache erlediged und müend jetzt morn nur no fertig packe. Nemmt mi jo wunder, ebmer alles womer wänd, chönd metnäh.

Am Mettwoch gots de los, am viertel ab zwoi ab Basel, à direction Frankfurt und vo dete wiiter zerst uf Soul, Südkorea und denn uf Sydney. Hoffemer das klapped wörkli de au riibigslos.

Tschüss, bes zum nöchste mol

Debora und Michi

p.s. wenn öber gärn euse Blog regelmässig list und es email wett öbercho, wemmer öbis neus düend druf, cha sech grad do rechts amelde: diesen Blog verfolgen; dann links: Neu bei Blogger melden sie sich aklicken; im neue Fenster: es bestehends Email igäh(2x) und es Passwort nach Wahl igäh. De Anzeigename erschient denn unter de regelmässigen Lesern. Er chömed denn es Email öber, woner müend zrugbestätige (aklicke vom azeigte Link) und denn, den chömeder emmer es Email öber, wemmer de Blog neu update. Hoffentlech, de Beschreb esch klar formuliert, dass alli das chöned