ganz vel verschednigs

Do leider de Blog ide letzte paar Wuchene ned ganz eso regelmässig aktuallisiert worde esch, gets worschiinli chli en längere. Ned verpasse döfeder de letzti Teil =). Dete beschriibt de Michi, was em amigs eso dure Chopf got, wemmer en ganze Tag nur Auto gfahre send. Sehr empfälenswert =)
Die letzte guet zwoi Wuchene semmer wörkli rächt vel em Auto ghocked. Mer send de Uluru go bestunde und send denn direkt idi Wunderschöne Tablelands vom norde vo Queensland gfahre.
De Uluru esch eigentlech rächt läss, aber glich ned esoo spektakulär gsi. Erstundlech esch wörkli, dass er eifach so emene ganz flache Gebiet usem Bode ragt und au dForm esch rächt cool. Mer händ met jenste andere Lüt denn au no de Sunneundergang bestund, aber de esch ned emol soo spektakulär gsi. Ergendwie hämmer dänkt, dasser denn wörkli so ganz speziell rot lüchtet. Aber er lüchtet eigentlech ned meh, als alli andere Sache emene Obigliecht.
Vom Uluru hämmer eus denn e vier Täg zerst noch Mt. Isa verschobe, dete hämmer dChelbe wo grad em gang gsi esch gnosse. Dpriise händ eus fast chli henderegschletzt. Das ufs Gländ cho besch het scho 13 AUS kostet, dBahne so vo 7AUS ufe. Mer händ eus denn no längere ede Usstelligshalle vergnüegt, es het dete ganz vel Wettbewerbe gha. Vom Foti öber dBlueme zum Chueche esch eigentlech alles debii gsi. Sehr lustig.

ou jo, de vogel hani uf de Fahrt dehe ufgläse, und do dregle esch, das de wos Tier verwötscht, sTier mues abchraze, esch das halt mini leidi Ufgob gsi.
Noch MT. Isa händ denn langsam Tabellands agfange. Das esch sGebirge do wo wörkli sehr sehr schön esch. Dberge send alli meteme Urwald öberzoge. Am Afang hets fast chli usgseh wie ede Schwiiz. Mega läss. Dete hämmer au es Schwiizer Resti gfunde und händ sett 5.5 Mönet wederemol e rechtig feini Bratwurst gässe, mmmmh mega fein.
Denn hämmer am Sunntig agfange wwoofe. Es esch wörkli serste mol gsi, wommer eus vo Afang a ned wohl gfüehlt händ. Wenns nochem Michi gange wär, wäremer am Mäntig scho weder gange. Mer send denn mol no blebe, händ aber scho am Mäntig weder die erste neue wwoofer Mails verscheckt. Esch ned nur eifach zbeschriibe, was ned guet gsi esch. Worschiinli het eifach dChemie ned gstumme. Grundsätzlech hämmer rächt cooli Arbet gah, vorallem schriinerle und striche. Sie send glaube sehr froh gsi, semmer dete gsi und händ eus das au emmer weder gseit. De Michi het au es eiges Arbetsauto gha... =) Aber näbedem schaffe hämmer sochli sgfüehl gha, wenns eus wörkli ned. Zum Biispiel hämmer nochem Znacht wenn de chlii (4) es Bett esch au fast nur es Bett chöne. Sie händ emmer am Obig rächt vel drunke und kifft und domer ned es Büro händ döfe (wo de Fernseh gsi wär) und ned ed Stube händ chöne, do dZemmertöre vom Chliine us Glas gsi esch hämmer eigentlech nur ede Chuchi chöne sii... Au bem Ässe (was vorallem de Michi gstört het) hetsie (vorallem dJo) eifach greut. Sie het nie gfrogt, ebmer nochli welled, so esch de Michi eigentlech emmer hungrig gsi. Und woner einisch Fleisch agschnette het, und das chli grosszögiger als sie hette (aber no lang ned unanständig gross) hetsie öbis dezue gseit. Am Mittwoch hets dezue nochli en „grössere“ Krach gäh. Zerst hämmer wörkli dänkt, jo chom mer haues doch eifach, händ eus denn aber chli besunne und dänkt, dasses doch ned cha sie, wäg so öbis chliinem grad sHandtuech hezwärfe. I ha i denen Täg rächt vel ufe Chlii müesse ufpasse und am Donnstig hett Jo denn brüeled, weller mech lieber het als sie. Das esch denn de Punkt gsi, womer wörkli gseit händ, dasses das ned brengt. Am Friitig morge semmer gange.
Sett do hämmer dOstküste weder bestuned, met dene wunderschöne Stränd und send en Cairns glandet. Cairns esch rächt läss, esch schön grüen, het vel netti Restis und en schöni Meerespromenade (au met könstlichem Pool). Noch zwoi Täg dStadt besichtige semmer gester uf dGreen Island gange. Cairns esch jo quasi dHauptstadt vom Great Barrier Reef und so hämmer das au welle gseh. Green Island esch nur en chliine Teil vom Reef und esch halt ned ganz so wunderschön wies offnige Reef. Doch dos en Insle gsi esch, hets halt nochli meh alternativene zum tauche gäh, wo grad före Michi halt nochli besser gsi send, susch wär er eifach en Tag ufem Boot ghocked. Mer händ en Glasbodeboottour bueched, wo sehr läss gsi esch zum dKorallene gseh, denn hämmer au no en SEMI-SUB Tour gnosse, womer im Wasser ghocked send und so dFesch chli besser gseh händ. Ich be denn au no go schnorchle und es esch wörkli mega gsi. All die wunderschöne Fesche und Pflanzene. Em Gägesatz zum letzte Mol hani fast nöm usem Wasser welle =). dFotene send halt ned esoo guet, aber hoffentlech gänz glich chli en Iidrock.
So i muess ufhöre, e 10 min fangds Wasserairobic a do ufem Camping =). Mer fanged am Mettwoch weder noimed met Wwoofe a, enere Bluemefarm. Hoffentli werds chli besser, i ha fast chli Angst devo.
Und jetzt joned am Michi sini Gedanke verpasse =)
(vor Mt.Isa) Mer send höt bereits vier Stund am Autofahre und de Michi macht e chlini Erzählig:
„Setem letzte Wwooferplatz semmer 13000 km wiit gfahre. Das heisst, öbe drü viertel devo benich gfahre und dur das dasses ned en sehr interessanti, abwächsligsriichi Gägend gsi esch het sech de Michel halt susch versuecht ablenke. Die womech besser kenne, wösse, dassi sehr gärn due zelle und zwor alles mögleche. Do esch zum biispiel de Abstand vo Strossepfoste zu Strosseposte normalerwiis 100m, es cha aber starch abwiiche, well dAzahl vode gschrechlete Mettellinie dezwösche ned emmer glich esch. SMaximum liit be 27, sMinimum be 17, usgnoh vode Bruggepföste, de chas no vel weniger sii. Durchschnett betreit circa 22 was denn ebe öbe 100m usmacht.
Was mech natürlech au emmer beschäftige mag send die diverse Grüsch wos bem Fahre macht, sigs es quitsche oder es knarre, doch i hami mettlerwile müesse demet afrönde. Was mech au sehr fest beschäftiged esch Tankazeig. Mer händ 135liter em Tank und 20liter Esatz ufem Dach, dass lot mech sehr vel loh rächne, aber meistens stimmt de Verbruch de glich ned met mim grächnete öberii. So hämmer dMarta fast scho einisch zude nöchste Tankstell müesse stosse. Die diverse Steischläg ede Frontschiibe muesi natürlech au emmer weder kontrolliere, ebs ned grösser worde send. Zum Teil wärdes sogar zur Kontrolle metem Felzsteft markiert. Au de Reservetank ufem Dach esch emmer weder en Bleck wärt, eber ned verrötscht esch. Was öbrigens au sehr interessant esch bede Kurvene, send di gstrechlete Linie uf de einte Siite vode durezognige Linie zelle. Do betreit de Durchschnett ca 27 Felder, de normalfall esch so um die 21 Felder, schunt aber glich öbe vor, dasses wiitus meh cha sii, wo de Rekord be ca 52 liit, usgnoh esch do de einti spezielli Fall, wos öber 138 Felder gsi send. Au de Güeterzug het eus einisch zum ahalte brocht, und es send also 3 Loks und 234 Wäge gsi. Dstrosseverhältnis händ ned eso grossi Abwichige vo West Australie öbers Northen Territory zu Queensland, wobii uffallt, dass em Norden Territory sehr vel Falschmarkierige gha het und sie dur das eifach dröbergstreche händ, was mer szelle ned grad erliechtered het. De Strosserand: Im Allgemeine sehr suber, gepflegt, frösch gschnette aber au do, em Northen Territory uffallend vell Bierdosene und Bierkartons am Strosserand. Die tote Tier variiere vo Bundesstaat zu Bundesstaat ned sehr fest, es get Kanguruus, Schlangene, Dingos, Chüeh, Vögel und Wallabies. Sussehe vo dene arme Tier esch aber sehr verschede. Do gets die Flache, mehr mol öberrollte, und de gets (dMehrheit) wo tot am Strosseland lege und no rächt guet usgsänd. Wobii do gets au weder starchi Underschiide, mer gseht guet, wie lang das scho dete legged, es get die vo gester, de gets chli die ältere, wo ufbleit send und dBei id höchi strecke. En wiiteri Stufe esch scho nöm ufbleit, wobii mer eigentlech nur no Hut und Chnoche gseht und zum Schluss gets de nur no sChnochehüfeli. Die interessantischte send aber die wo frösch tot send und de Adler sTier bereits ufgschletzt het und grad am fresse esch. I ha dänkt, mer tüege das Fotografisch ned festhalte.“

Obetüür Australie

SObetüür got wiiter!

Nochdem dassmer wie bereits gschrebe euses Visum händ chöne verlängere hämmer eus rechtig Litchfield NP ufgmacht. Dete hämmer zwoi Täg lang die vele schöne Schluchtene, Wasserfäll und Pools gnosse.

Wiiter esches denn rechtig Alice Springs gange. Underwägs hämmer sehr vel Waldbränd gseh. Em Moment send dass aber "controlled burnings" wiemer dem so schön seit, dass heisst, mer duet extra de Wald azönde, dass dVegetation sech weder besser cha verbreite. Wies ganz gnau lauft, wössemer au ned, vorallem ned, wiesisi wörkli düend kontrolliere, aber glich semmer fasziniert gsi vom Füür, wo so en gwalitig Chraft het. DFahrt susch esch relativ lang gsi dete he und so hämmer underwägs ufeme Homestead gschlofe. Es esch au dasmol rächt läss gsi, vorallem wells am obig am sebni en Diashow gäh het öber dRenderfarme, wo das Homestead en Teil devo esch. Es esch wörkli interessant gsi mol e de Teil vode Fleischindustrie inezluege. Läss esch aber au gsi, dass wörkli sehr vel vode Camper die Show glueged händ. so esches en rechtige Event worde. Sogar hämmer nochhär no döfe Wasserrüetle und Geisslechlöpfe, obwohl grad szwoite bemer ned klapped het, trotz de vele guete Rotschläg vode umstehende Routiniers =).

Mer send denn am Samstig obig en Alice Springs acho und händs eus ufeme Camping gmüetlech gmacht. Öbe e Stund nochdem dassmer achosend, mer händ henderm Auto am Teschli gwörfled, het ufzmol öbis komisch tönt und sekunde spöter het dMarta brönnt!! Mer send schön verschrocke. Leider hämmer dHube fast ned ufbrocht, sMARTA-Scheld erschwärts sehr. So esch eus schlussendlech nüt anders öbrig blebe, als Scheld abzriise und dHube denn zöffne. Zwoi nätti Nochbere (wo grad e dem Moment acho send) händ eus gholfe sAuto zlösche. Brönnt het eifach de Alasser. Mer send sehr dankbar, dasses het döfe ufem Camping passiere und vorallem dure Tag und ned dur dNacht womer gschlofe händ. Glich esches en rächte SChock gsi. Natürlech esches Samstig gsi, so semmer am Sunntig ufem Camping festghange. Dos aber am Morge es gratis Pancakezmorge gäh het, esch das ned emol so schlemm gsi. Vorallem hämmer dete au jensti Lüüt kenneglernt und vel plaudered. De einti Ma het eus denn mega lieb am Mäntig zunere Garage abgschleppt und dete hämmer denn euse Alasser gfleckt und eusi MArta esch jetzt isatzbereit.

Morn fahremer zum Urulu, dem bekannti roti Berg em nüt. Mer freue eus druf, obwohl, eigentlech fahrsch 800km retour, nume um de Berg zgseh, aber jonu, es betzli liide muemer halt als Tourist.

Danke vel mol, för all die liebe nochfroge bezöglech Visa und so. Esch schön zgspüre, dass er so a eus dänked.

nur ganz churz

Mer send am Ziistig denn wie planed zu de Bank wo eusi Kreditcharte gha het und Gott sei dank (woerkli) eschsie no emmer em Automat und doher umbeschaediged gsi. so semmer denn direkt zum office vom department for immigration and citizenship und haend euses zwoite Visum beatreit. Die erst Ussag vo de nette Dame henderem Pult esch gsi: er send secher mega stolz uf de Roger Federer! So haemmer vo afang a oeper gha wo eus sehr guet gstemmt gsi esch, sie esch glaub en raechte Fan vo em und dorum guet gstemmt uf Schwiizer und so esch das ganze woerkli schnell duregange. Anschiinend getses saelte, dassi de Atrag grad sofort abweckle, normalerwiis naemsne eifach mol entgaege und duenden nochher pruefe, bzw fordere no zuesaetzlechi Sache ii, ect. das chas sich also raecht wiiterzieh. mer haend sVisum noch 45min em Pass gha.

Mer send euch fest dankbar foers Gebaet und em Herr foers so eifache und guete glinge.

weder vell erläbt und no emmer am reise

Wedermol setzi em Auto und verfasse de Blog wäredem Fahre. Mer send wörkli rächt vel metem Auto underwägs em Moment. West Australie esch eso resig, unvorstellbar. Grösser als Dütschland, England und Japan zäme. So machemer wörkli sehr vel Kilometer und obwohlmer set gester em Northen Territory send, send Dussechte ned vel besser. Landschaft do ganz em Norde vo Australie esch sehr schön. Es het einersiits grossi Bergregione (zbsp Kimberly), vel grossi Flöss und vorallem send alli Boim schön grüen. Mer send eus durchus bewusst, dass das ned sganze Johr so esch. Do em Norde esch dRägeziit vo November bes April. Das heisst, mer send jetzt grad nochhär und so cha dNatur no fest vom Wasser zehre.

Broome esch sehr en lässigi ganz spezielli Stadt. Sie esch vo Japaner zum Perletauche gröndet worde und de asiatisch Touch hetmer bes höt erfolgrich probiert biizbhalte. Obwohl Broome gar ned eso en chliini Stadt esch hets eigentlech nur eistöckigi Hüüse, alli umgäh vo Palmene und schönem grüen. Dur das hets eigentlech meh vomene Dorf, als vonere Stadt und das esch sehr sympatisch. Mer händ drü Nächt en Broome gschlofe, en Rekord settmer weder am Reise send. Eigentlech hämmer gar ned eso es Programm gah. Eigentlech isch nur sVisum uf de Erledigungsliste gstande. Aber mer händ usegfunde (wämer sZüg amigs vo Afang wörd genau dureläse, giengs amigs chli schneller und wär weniger nerveufriibend), dassmer ufes Büro müend. Dos en Darwin eis het, esch das also keis Problem. Grad höt hämmer emol sFormular usdruckt und düends scho brav em Vorfeld usfölle, dass de Bürokram den ned alzulang got. Susch hämmer zBroome eigentlech vorallem de schöni Beach, de Swimmingpool (wo sälbst nochem Beach no guet gsi esch, wells am Obig eifach ned het welle abchüele) alli die schöne Schmuckläde (wos tuusigi gha het) und de legendäri Sunneundergang gnosse.. Die heisse Nächt händ eus wörkli chli zschaffe gmacht, so hämmer eus för 4 Aus en Muggenetz kauft, händs chli verschnette und hänkets jetzt emmer öber de Kofferum und die zwoi hendere Fenster, so esch eigentlech smeiste vom Auto die ganz Nacht lang offe und so gots zum schlofe.
Noch Broome semmer denn wiiter noch Derby gfahre.Eigentlech es chlises verschlofnigs Städtli wos ned vel zgäh het. Eigentlech nur en Gfängnis Boab Tree. Boab Trees send ganz lustigi Bäum, womer erst sett Broome gseh händ und wos anschiinend au gar kei Artgenosse do en Australie get. De einzig verwandti Baum läbt en Madagaskar. Do de Boab Baum kei Johresrenge macht, weissmer ned rächt wie alt dass send, aber grad vo dem Gfängnis Baum nemmt mer a, dasser scho guet tusig Johr mues alt sii. Gfängnisbaum öbrigens dorum, wellmer met de Gfangene amigs zum nöchste Gfängnis glofe esch und sie underwägs zum Schlofe ede Baum ineghöckt (er esch hohl) und dete akettet het. Das esch aber ned wörkli de Grund gsi, wieso dassmer noch Derby send. Derby esch de Afangsort vo de Gibb River Road, 710km Dreckstross, met jenste Flöss womer muess durchquere und dorum 4x4 sehr empfohle esch. Das hämmer eus natürlech ned welle entgoh loh. Es send drü holperigi und lustigi Täg worde. De ersti Fluss womer durchquert händ esch grad för de Michi es rächts Highlight gsi! Er esch rächt duregschosse, als folg devo hämmer es paar Schruube vom Underbodebläch verlohre. Das hämmer denn halt methelf vonere Schnuer ufebunde und händ so die nöchst Buschgarage apeilt.De Garagist esch leider ned ume gsi, aber sini Muetter het en eus as Telefon gholt. Mer händem den probiert zerchläre was passiert esch und er het eus empfohle, sBläch eifach abzschrube und spöter den aschrube zloh. So het sech de Michi denn en Dreck gleit und das brav usgfüehrt. So hämmer jetzt scho ganz vel Sache uf eusem Dach gha, eusi Rucksäck, 10lt Wasser (mer händ em ganze 30lt debii), 20 lt Benzin und emmer no eusi leer Felge. Eigentelch hämmer die no welle Ufmunizioniere, beformer met de Gibb River Road agfange händ, wellmer seit, dasses ned ungwönhlech esch, dassmer zwoi Ersatzräder brucht. Mer send en Broome und au en Derby go en secondhand Reife go sueche und tatsächlech, ein Mech het eine gha. So hämmerem dFelge dete gloh und womer nochere Stund weder cho send, hetter en gueti und en schlechti Nochrecht för eus gha. Leider het de Reife glich en Mangel ufgwese und er chanen eus ned verchaufe, aber er het susch en neue för 200 Aus. Was defo gnau die guet Nochrecht gsi esch, esch eus bes höt ned klar =) aber mer händ denn halt dFelge weder leer obedrufbunde und öbrigends kei Ersatzreife brucht! Ade Gibb Riverroad hets nomol Schluchtene und Wasserfäll gha und mer send no einisch es paar vo dene go aluege. Gschlofe hämmer ei Nacht eifach chli em grüene und die ander Nacht semmer ufeme Buurehof gsi. Sehr oft biete Buurehöf, sogenannti Homestads Campinglägeheite a und dos sehr läss gis esch, wämmers definitiv weder mache. Es het en Hot Water Donkey gha, en grosse Ofe wod hesch müesse afüre, dass heiß Wasser gha hesch bem dusch, wörkli glatt. Das Homestad het au no es chlises Resti gha wo Scones met Schlagrahm und Konfi dSpezialität gsi esch. Scones sind enard Dampfnudle und so hämmer eus prompt zum Zmorge so eine gönnt. Die Fahrt esch wörkli sehr glatt gsi, obwohl eus grad sholpere fast chli ufe Geist esch, besmer am letzte Obig usegfunde händ, dassmer eifach müess Luft us de Reife loh und so esch de letzti Tag vel rühiger verlofe. Natürlech hämmer au jede Fluss womer durchquert händ müesse filme und fötele =). Mer send jetzt scho em Gebiet vo de Krokodils händ aber leider no keis gseh (oder zum Glöck). Grad bem letzte Fluss hets es Scheld gha, dasses Salzwasserkrokodil hett. Em Gägesatz zu de Suesswasserkrokodil send die resig und durchus agreffslustig.
Dgibb River Road hett en Kununura ufghört, de letzte Stadt em Weste. Sie händ do umenand en Teil vom Film Australia treit und die Iheimische send unheimlech stolz. Anschiinend sell dNicole Kidman vom guete Wasser do schwanger worde sii =). Grad näbe Kununura hets de zwoit grössi Stausee vo Australie und er esch wörkli wunderschön gsi. Gläge emene Gebirge erennereter fast chli an Vierwaldtstättersee.
Ahang: Domer leider kei Internet gha händ die letzte zwoi Täg esch eusi Gschecht schochli wiiter gange. Mer send mettlerwille sett drü Täg en Darwin und wänd jo ebe sVisum verlängere. Mer esch aber vorgester es chlises Maleur passiert. Mer händ bemene Bankomat met de Kreditcharte welle Geld abhebe. Do en Australie muessmer emmer uswähle ebs Savings oder Credit esch. Domer dKreditcharte brucht händ, hani dänkt dröcki Credit. Sesch die falsch Entscheidig gsi =). Es het eus dKarte nöm usegäh (halt worschiinli wellmer be dere Bank e kei Kredit öberchöme oder so). Uf jede Fall hani denn uf dHotline aglüte und ha ebe halt erchlärt, dass dKarte nöm usechunt. De charmanti Herr het mer denn erchlärt, dassi be minere Bank müessi en Ersatzcharte bstelle. Ha churz gstutzt und gfrogt wieso (mer chöne sVisum nur met de Kreditcharte verlängere und domer das em nöchste Monet müend mache werds evt chli just metere neue Charte öberzcho). Er het mer den erchlärt, dass inezogni Chartene zurschnette werde, wenn de Automat vode Bank glärt, bzw gflöllt werd. Das esch grad sochli scheisse, ehrlech gseit. Er heit sochli gmacht, dassmer, wemmer grad bede Öffnig vode Bank dete send, no Chance händ, dass dCharte evt no ganz esch... Danke wenner chli a eus dänke und bätte, dassmer dCharte wörkli weder öberchömed. Das met der Ersatzcharte esch grad nur en mässig gueti Lösig em Moment.