Im wilde Oste

Was fören Wuche!

Chli verspöted, nämli erst letzte Friitig hämmer en Bloomsbury weder agfange wwoofe. D'Renderfarm ghört ade Beth und am Ray, emene end-föfzger Ehepaar wosech das Land vor 1.5 Johr kauft händ und sech do jetzt eres vorussechtlech letzte Huus zum Alt werde ufbout händ. Sland vo ene liit am Endi vonere 10 km lange Dräckstross, noch ene chunt nüt meh. Dass heisst, kei Verchehr, kei anderi Lüüt, nur en wunderschöni Högellandschaft met Regelwald öberwachse, 500 Chüeh und die übliche Vögel. Shuus womer es Zemmer undes eignigs Bad devo döfe nötze esch vor 18 Mönet vo ene agfange boue worde und esch wunderschön und wörkli so guet wie fertig.
Us dem wo no zmache esch, bestoht eusi Arbet. De ersti Tag hämmer Liistli gschlefe und lackiert, settem drette Tag, also am Sunntig, semmer dra amene Sofa öberzieh. Es sehr es interessants und lässes Projekt. De Michi het vorallem am Afang gholfe, de alti Öberzug abzneh und de neu Stoff, womer duet direkt as Gstell mache, anagle. DBeth und ich send sett do am Chösi öberzieh und Ziehrchösi schniidere. Höt am Mittag hämmer das Projekt offiziel abgschlosse und sEndprodukt chasech echt gseh loh. Es esch wörkli rächt schön, wemmer dra dänkt, dass niemer vo eus schomol es Sofa azoge het! Die andere Täg het de Michi am Ray gholfe, dLiistli zfixiere und Gsteller idi no leere Abstellchamere zbastle.
Am letzte Samstig hämmer aber en Tag Pause gha vom naie und händ met de Render gschaffed. Aso ich ha eigentlech nüt gmacht, ussert Fotene, und dStöck ghebet, wos amigs de Chüeh de Weg durd Ghäg gwese händ. Gmacht hämmer folgendes:
Es send alles relativ jungi Chüeh und Bulle gsi, dass heisst, mer het sie müesse gäge Zecke behandle und brandmarke, dBulle hettmer zudem müesse kastriere und dene met Hörner dHörner abschniide. Es esch en rächt ruchi Sach gsi, definitiv. Zerst hämmer die ganz Gruppe vo 60g Tier (wo em alli em einte Ghäg gsi send) halbiert. Die Hälfti wo als erst dra cho esch, hämmer rechtig „Schleuse“ ines anders Ghäg do. Vo dete hämmer denn emmer so ca 15 Tier enes no chliners Ghäg grad vor de Schleuse bugsiert. Dschleuse bstoht us zwoi Chammer, wo je ca 5 Tier wörde ineghöre. Do aber ede vordere Chamere sTier esch, wo grad bearbeited werd, hettmer so max ca 6 Tier denne. Also werd emmer ei Chueh edi vorder Chamere do, denn werd hende dSchiebetöre gschlosse, das kei anderi cha ine cho. Das dönt sehr eifach, aber do meh als nur ei Chueh i die vorder Chamere inepasse, esch das emmer chli en Sach, bessmer Tier trennt het. De Chueh ede vordere Chamere werd denn de Chopf iklemmt, dass sie sech nur begränzt cha bewege, denn werd schnell chli Zeckegeft uf de Rögge gsprötzt, zum Zeiche dassmer das gmacht het am Schwanz chli Hoor abgschnette und denn werdsie met einere Manneschraft am Schwanz ad Chammerewand zerrt. Uf de andere Siiter stoht denn de metem Brönnstab und so werd dChueh brandmarkt. Das macht ere eigentlech ned weh, sie händs halt eifach ned so gärn, wemmer so am Schwanz zeiht =). Bede Bulle werd denn grad au sofort kastriert und das ned emol so kompliziert. Meteme Skalpel werd de Hodesack ufgschletzt, denn werd ein Hode nochem andere eifach usegresse. Aber au das schiint em Bulle ned meega wehzdue, au do esch sProblem weder eher, dassies eifach ned soo gärn händ, wemmer ene am Hode umemacht. Do händs scho mängisch rächt protestiert, und de Michi, wo de Schwanzhalter gsi esch a dem Tag, het amigs rächt müesse entgägehebe. Obwohls no relativ jungi Tier send, hett scho rächt grossi und starchi Männli drunder. Denn chunts Hörner abschniide. Das esch die Aktion wo am bluetigste und am schmerzhaftigste esch. dHörner werd eigentlech eifach metere grosse Zange (wo chli usgseht wiener Zigarreschniider) abknippst. Doch umsogrösser dHörner scho send, umso stränger esches und umso meh machts de Tier. Do händs eim amigs schochli leid do, aber das ghört halt eifach dezue. Be öbe drüne hetts denn au mega blüetet. So rechtig wiit usegsprötzt. Em Summer wördmer dHörner ned schniide, wells Bluet weniger schnell sickered. So chönte dChüeh verblüete. Aber eusi Tier händ alli nöm blüetet, besmer sie weder uf dWeid gloh händ. Es esch sehr läss gsi, das emol döfer zerläbe, au wenns schochli raff gsi esch.
Am Samstigobig hämmer denn sWelde Weste Fieber grad wiiter gmacht und send anes Rodeo. Es esch rächt es chlises gsi, aber dos euses erste gsi esch, womer gseh händ, esches super gsi. Also eigentlech esches es Bullriding gsi, dass heisst, dRodeos send uf Bulle und ned uf Rösser grette. De Fanfaktor esch wörkli gross gsi. Vorallem krass send wörkli die Bulle gsi wo noch dem, dassie de Riiter abgworfe händ, de grad agreffe händ. För das hets denn aber Bullfighters, wo zwösche sTier und de Rodeo inegönd und die Allfällige Schläg istecke. Wörkli zu usgfüehrte Agreff esches aber ned mängisch cho. Vell händ dBullfighters dTier chöne ablänke und sech denn en Secherheit brenge. DBulle send zum Teil sehr lang agrefflustig blebe und händ nüt welle wösse, vom Feld ruume. Aber bes am Schluss, meistens noch muetige Aktione vode Bullfighters esch no jede Bulle usde Arena usetrotted. För Zueschauer hets öbrigens no en „schönste Cowboy und Cowgirl“ Wettbewerb under de Chend gäh. Vell härzigi chliini Chend met Cowboyhüte und -Stefle. Spöter hets denn au no e Chälblijagt gäh, wo Zueschauer en Zwoierteams händ chöne atrette und es Chälbli hendere Linie müesse an Bode rüeher. Tönt definitiv eifacher allses esch. Scho die chliine Chälber händ sech nüt lo säge loh =). Es esch sehr en lässe Obe gsi, sehr läss hämmers döfe erläbe.
Am letzte Ziistig hämmer denn grad no einisch öbis eher Raffs „döfe“ erläbe. Also eigentlech hämmer jo freiwillig metgmacht =). Zwoi Bekannti vo Beth und Ray send uf erem Land uf Sauejagt. Sie händ eus netterwiis metgnoh. Anschiinend esch das do no rächt üblech und so hämmer das ned welle verpasse. SGanze esch eigentlech rächt simple, aber au rächt brutal. Mer got met Hönd (mer händ zwoi Doberman debii gha) en Rägewald go laufe. Denn, ergendeinisch, wettere dHönd en Sou und verfolged sie und brengesiesie met Gwalt zum ahalte. So warte dHönd denn (dSou am Ohr hebend) bes dLüt azsprenge chömed (sobaldmer die protestierend Sou ghört, werd usem spaziere es rächts ghetzt dure Urwald, dasch no läss gsi!). DSou werd denn packt und erstoche. Dos vel Weldsäu het ede umgäbig machts grundsätzlech de Natur nüt, aber glich hets grad mech schochli raff dunkt. Vorallem händs die Sou, womer gfange händ, eifach lege gloh. Sie werd dete vo Dingos und andere Säu gfrässe. Wemmer chli zentraler gläge wär, wördmer die tot Sou verchaufe, die werd öbrigens meistens uf Dütschland gscheckt, worschiinli als Spezialität...
So hämmer wörkli einiges döfe erläbe, vorallem vell einmoligs. Mer händs au met ene zwoi wörkli guet. Dbeth esch öbrigens en fantischi Quiltlerin, sie macht Patchworks, vell Bettöberwörf, macht Teschdeckene, Stoffhönd, -Kängurus und Puppene. Natürli alles schön verziehrt und bestickt. Do alli liebe Wwoofergirls wo wänd, öbis chlises met erem Material döfe naie, benich jetzt wie weld am Stecke. Es get es schöns Nodelchösi und en Chörbliöberzug, woni nochhär so chlini Naisache cha driidue =). Es machtmer wörkli vell Spass und do ich jo öbis ha döfe uswähle, esches au gar ned eso wüest =).

bes Gärtners

Settem Donnstig semmer also do uf de Blueme- oder besser Pflanzefarm. Nochem letzte mol wwoofe semmer wörkli gspannt gsi. Dfamily do esch aber wörkli ganz lieb und so hämmer eus rächt schnell igläbt. Zude Familie ghöre zwoi Chend, de Sean und dJanine, zwoi Hönd, Hüehner, Tube und dEltere, de Scott und dAnn. Darbet esch dur das, dasses e Pflanzefarm esch, rächt eisiitig, grad för mech... I be set am Friitig am umtopfe, döngere, töpf putze und weder umtopfe. Wells jo kei strängi arbet esch, gotsmer jo eigentlech ganz guet debii und trotzdem. De Bach, woni Töpf dene due putze esch rächt chüel und do sWetter ned meega heiss esch (scho emmer no so um die 25C) esches gar ned eso eifach, noch 4h dFüess em Wasser zha weder ufzwärme. Umpflanze dueni sitzend ufeme Stuehl, dass heisst, eigentlech klappimi denn drofe zäme, so dassi halt guet am Bode mag lange, das esch ned emol soo super för de Rögge, donis halt au bis zu foif Stund am Stöck mache. Aber susch wotti ned chlage =). De Michi hets körperlech vel stränger. Sie send wie fast alli Australier nochli am boue, sHus esch wie fast öberall eifach noni fertig, und au dUmgäbig ned. Die Wuche het de Michi vorallem gholfe landschaftsgärtnere. Stei ufbiige, Erde, Dönger und Mulch drufbiige, Schneisene för Ablaufröhre grabe, Ches verteile und so wiiter. Er esch emu ganz erlediged, doer halt scho länger nöm ganz eso strängi, körperlichi Arbet gmacht het.

Met de Familie hämmers wie gseit wörkli guet. Am Afang esches ned mega härzelch gsi, aber das het glaub ned emol met eus zdue gha, sondern met de Tatsach, dass dEltere vo em (so quasi die verhasste Schwegereltere vo ere) em Dorf emene Hotel wohned und dorum eigentelch jede Tag verbiilueged. DAnn het wörkli ned emol so freud dra. Met de Schwegereltere segs glich wie met Fesch, hetsie gseit, nöch drü Täg stenkes.
I eusere Freiziit hämmer e dere Wuche ned emol so vel gmacht. Domer emmer bes ca am drü gschaffed händ, semmer amigs chli zfuul gsi, zum no gross öbis zundernäh. Mer händ dorum vel Pingpong gspelt. Das esch wörkli rächt läss! So chumi sogar chli drii. Ned dassimi metem Michi wörkli cha mässe, er muess emmer no schön brav spele, aber glich hani meh oder weniger glernt, vorhand zspele und zwöschedure klappeds au mol zum eine schniide... Grad vori hämmer en Match gspellt, woni 13-15 verlore ha und das esch glaubs sbeste bes jetzt, und das be Spelpraxis vo bes zu 2 Stund am Tag. Aber es macht eus beidne Spass und das esch jo dHauptsach. Schlofe duemer öbrigens emne Zält undereme Schärme. Mer gfallt das no rächt, es schmöckt chli wie sYvonnand, so liecht gräuelig =). Aber dur das, dasses ede Nacht scho rächt chüel esch, chönemer super schlofe e eusne flauschige Schlofsäck. Was ned nur mega eifach esch, esch de Morge =). Wenns no dunkel esch, fot de Göggel a chreie und weckt eus regelmässig. Er ziehts wörkli öbe e viertel Stund dure und esch denn weder ruhig föres Ziitli. Nochdem dass grad so wieder igschlofe besch, rattereds sSugercanisebähnli obe ade Schüür dure. (do hets ganz vel Rohrzuckerfelder und dÄrnt werd fast emmer metem Isebähnli zude nöchste Fabrik brocht). Aber domer jo wie emmer au do ned eso spot es Bett gönd, esch das jo denn glich ned wörkli es Problem.
Morn schaffemer no einisch und fahred denn am Nomittag wiiter rechtig Süde. Dete düemer denn bereits am Donnstig weder afange wwoofe und zwor ufere Renderfarm. Mer freue eus fest dete druf, wellmer das halt nonie erläbt händ. Evt esch das denn scho euses letzte Wwoofe, Ziit raast so rechtig, au wemmer jo scho noni ganz bald heichöme.