Am Sunntig letzt Wuche hämmer eusi Sache packt und send nocheme churze Tschüsssäge ab rechtig Südküste vode Insle.
Dete semmer als erst grad emol go Sandboarde. Es het dete es paar Sandhögle, wo little Sahara heisse und wommer ebe cha abe boarde. Das esch no es wörkli cools erläbnis gsi, zwor hämmers bes am Schluss ned gschafft, en Kurve zmache (ich nedemol regelmässig ohni Sturz abezcho =)) und doch hets sehr Spass gmacht. Wiiter semmer denn no anes paar schöni Stränd, lässigi Küstene und a zwoi drü offizielli Touristeattraktione. Dete hämmer denn au serste mol Seehönd gseh. 
Wörkli sehr härzigi Wese.
Am Mäntig morge semmer früeh uf und uf dnüni Tour zum Sealbay. Wellmer so früeh dra gsi send, hämmer en Füehreri för eus eleige gha. So hetsi eus sehr veles chöne öber dSeehöndkolonie wo dete wohnt verzelle. Mer händ bes 10 meter ad Tier anedöfe und sie händ sech schön brav fötele loh. die zwoi chline Seehönd händ also sogar eusi Füehreri fast usem Hüsli brocht. Sie hets sehr läss gfunde.
Nochhär semmer wiiter, händ Service gmacht be eusem Auto und send no es lustigs Pelikanfüettere go luege. Pelikan send rächt tolpatschig ergendwie und vorallem chönes ned tauche, dass het zum teil wörkli sehr lustig usgseh =).
Am nöchste morge hämmer eus denn ufgmacht, rechtig Weste. De ersti Tag semmer nur mol en Norde gfahre, sowiit, besmer uf de höchi vode Stross rechtig Weste gsi send. (ca 6h Reiseziit). Am nöchste Tag semmer denn nur en relativ churzi Strecki bes so zum endi vede Zivilisation gfahre (ca 5h)
und denn, am öbernöchste Tag, am Donnstig esches losgange: öber 1000 km, Reiseziit vo ca 12h, 2h Ziitverschiebig, keis Dorf, womer durchquert händ, nur mol en Tankstell mit Motel und Camping. dLandschaft het sech i dene 12h eigentlech ned verändered. Die drü Föteli send vom Afang, noch 6h und noch 11h. Was sech verändered het esch mängisch de Belag gsi vode 
Stross (öbrignes wörkli e schöni Stross gsi!). Au semmer mol churz anere Hügelchetti verbii gfahre und einisch churz am Meer... Das wars. Mer händ au die längsti gradi Strechi hender eus brocht. 146km ohni Curve! 
Rächt müed (bsunders ich, obwohli nur max 2.5h vo dere ganze Fahrt sälber gfahre be) semmer denn weder bemene Ort acho. Wörkli sehr idröcklech, wemmer gseht, dass sooo lang niemerd wohnt, sLand ned gnutzt werd und eifach nüt esch, ossert mol chli Büsch und Boim...
Settem Donnstig bewegemer eus weder under Lüt, was no rächt cool esch. De Michi het sech am Friitig vo sim Playoffbart befreit (er hettne, trotz Berns uscheide nochli gloh) und het au susch weder e cooli Frisur öbercho und ich be ganz erfroit zgseh, was fören attraktive Maa do met mer ums Land zieht =). Sett gester semmer en Albany, eine vode grösste Städt ade Südküste vo WestAustralia. Es esch sehr schön do, also vorallem dUmgebig. Es esch grüen (serste mol, dassmer wörkli grüens Gras gsänd, settmer en Australie send), es het Blueme öberall und es füehlt sech eifach wörkli sehr wohnbar a do. Leider esches schochli chalt. Höt hämmer nur ca 19C, also fast glich wie ede Schwiiz. Das macht eus schochli zschaffe, do mer bedi ned wörkli öber mega warmi Chleider verfüege. Mer hoffed jetzt eifach, dasses ned no vell chälter werd, susch müemer plötzli no en Snowboardjagge chaufe =)). Ufem Wäg dohe hämmer au no euses zwoite Ersatzrad verlore. SProfil het sech wärede Fahrt abglöst... Aber eigenltech sgrössere Problem esch nochhär gsi, dass euse Wageheber sAuto gar ned eso wiit cha löpfe, wiener sett, so hämmer denn schlüssändlech eusi leeri Felge ufem Dach no drunder do, und so esches emu scho super, hämmer sie emmer metgschleickt. Höt morge semmer do au no ene Gmeind und händs, trotz dassmer au damol weder ned eso vel verstande händ, gnosse.
dföteli wänd und wänd eifach ned drufglade wärde. Ich versueches de spöter no einisch, er verpassed nämmli schnügligi Seehundföteli =)
Keine Kommentare:
Kommentar veröffentlichen