in Margrit River

Mer send set em letzte Ziistig weder am Wwoofe. Vorhär hämmer aber no en Stopp en Burnbury gmacht und send dete under anderem anen Delphin Strand. Eigentlech sette dete am Morge mol chli Delphine go schwemme, aber leider händs de morge gstreikt =). Ich ha einisch rächt wiit use mol eine gseh uftauche aber ganz ehrlech es hetti au en Hai oder so was chöne sii. Jonu also semmer den rächt spontan noch Margrit River zu eusere nöchste Wwoofing Family gfahre.
Margrit River esch sochli DE Ferieort en West Australie. Es het en mass Wiiberge (womer scho be einier metem Jim send go degustiere =)) und schöni Stränd. Öber dOstere esch de Ort rechtig vollgstopfed gsi. Das seg anschinend emmer so, well den dLüt vo Perth alli abechömed, wells do eso schön esch. Was au wörkli esch. Mer händ settmer do send wunderschöns Wetter, warm und sehr agnähm. Dos Aafangs Mai afot rägne, und denn dLüt eher ab e Norde gönd, gnüsses dOstere so no als di letzti Chance em Süde Ferie mache.
Family womer do wohned esch eigenltech nur es Könstler Ehepaar, wo öbrigends au glich lang ghürote send wie mer, eifach er min 40 Johr elter esch als mer. Sie händ emene Zwoitgebäude Zemmer wos vermiete und met dene Mieter teile mer dChuchi und de Ufenthaltsrum. Schlofe düend mer emene Wohnwage. Aber es esch wörkli no lustig, met dene Mieter do. De Rod, en 60 jöhrige Könstler wohnt scho set zwoi Johr do und esch eigentlech wörkli en liebe. Leider drenkt er sehr gärn und doch rächt regelmässig öbere durst. Das esch eigentlech chli leid. Aber er moled sehr schön und gnüssts glaub no rächt do zwohne obwohler sech emmer weder chli öbere Jim (euse Husdad) ärgered. Aber das het denn amigs evt ebe chli metem Alkohol zdue.
Zudem wohned no es englisches Päärli und en Holländrin do und met ene hämmers wörkli au guet. So semmer eigentlech fast chli en chlini Familie =). Mer händ sett es paar Täg zwoi Metwwoofer. Die bliibed einigi Mönet do und kenned de Jim und Cyn scho länger. Sie send beidi sehr alternativ und au Könstler. So passes sehr guet dohe. Und mer velech ned ganz eso guet. Aber alli send lieb zu eus und mer händ gmüetlichi Arbet und feins ässe, so chönemer und düemer eus gar ned beschwäre.
Schaffe düemer em Moment vorallem amene Schopf, wo de Jim ohni Fenster und Törene kauft het und de Michi jetzt en wunderschöni Töre inebout het. Ich ha natürli au chli metgholfe, so quasi als Steft, ha gschlefe und gschrubed wie e grossi =). Zwoi Täg hani sogar chöne de Cyn hälfe naie, das esch doch sehr läss gsi, has gnosse, dass wedermol chöne zmache. Sie händ ebe es Boot kauft und fertig usboue und för dete hämmer zwoi Matratzeazüg gnait.

Gester semmer denn metem Jim, em Maurice (de ander Wwoofer) und em Pelle, emene Gaste ede Lodges (nur för öbe 3 Nächt) wörkli ufs Segelboot. Es esch rächt läss gsi. Zerst semmer mol es Rundfährtli go mache. Dete hämmer versuecht en Thunfisch zfange, das het leider ned klapped, ich ha deför sZmorge weder ed Wildniss usegloh. Denn hämmer sBoot weder ad Boie abunde und händ dete nochli gfesched und send chli ghängt. Nochhär semmer denn weder as Festland und hei. Sehr cool gsi, dassmer händ döfe druf. Anschiinend werdemer au nochli ufem Boot go schaffe, aber i weiss under de gegäbene Umstände halt ned, ebi emmer metgange, susch mueni no verhungere =).
De Jim got öbe enere Wuche ufen Segeltripp. Do dCyn ned eso gärn segled, fahrt sie anschiinend eifach chli ufem Festland met. Sie beidi schaffed meh oder weniger regelmässig met Aborigines zäme und Chyn hofft, dass den au uf dem Tripp chöne zmache. Sie esch sehr into Bastle und doher hani do chöne lehre, wiemer duet Chorbflechte.
Mer gnüsses do fest, es esch sehr léger und durchus läss zum läbe. Mer gnüssed sWetter und natürli au de Strand, wo wörkli sehr läss esch. Ahjo, de Grill het eus vo Afang a fasziniert =). Eb de Jim Sonne guete Könstler esch, naja mer chönt secher dröber diskutiere.
Ade Ostere semmer am Nomittag no anes Konzert es Pub vonere Blues Band. Sehr läss gsi. Schad gets be eus dLive Music ede Pubs ned so, dass chöntmer also wörkli öbernäh.