Ade Sydney

Wow jetzt esch Ziit so rechtig gfloge. scho esches eusi zwoit letzti Obig do en Australie. Unglaublech wie schnell 8.5 Mönet eifach so chöne verbii go, aber au unglaublech, ufwas dassmer alles döf zrugg luege.

Mer beidi send wörkli dankbar, för das womer händ döfe erläbe, för alles womer ned händ müesse erläbe und för die veli Ziit womer zäme händ döfe verbrenge.

Die letzte zwoi Wuche send rächt Ereignislos gsi, wemmer ehrlech esch. Aber das esch au gar ned eso schlemm. Mer send vel chli id Stadt, händ zwöschedure au mol en erholsame Tag deheime gah (vo was au emmer dasmer eus händ müesse erhole) send go Spaziergäng mache und händ grad au dFreiheit wo die öffentleche Verchersmettel do abüte gnosse.

Eis Highlight möchtemer aber glich no met euch Teile.

Mer send am letzte Donnstig i Sydney Tower go ässe. Das esch mega läss gsi. Mer send wörkli grad am Fenster ghocked und dur das, dass sich de Sektor met de Tesch drufe treit het, hämmer so die ganz Stadt vo do obe chöne gnüsse. Unglaublech schön gsi. Dos Buffet gha het, hämmer denn au so rechtig herzlech drigschlage. So fest, dasses eus beidne rächt miis gange esch nochhär. Aber es esch glich en mega lässe Obe gsi.

Die letzte paar Täg semmer jetzt vorallem am Seoul plane, send am packe und am ussortiere (mer händ scho zwoi grossi Plastiksäck voll alte Chleider de Heilsarmee brocht =)). Morn gömer denn so rechtig in Entspurt. Wäsche, packe, putze und no die letzte Zög do gnüsse. Denn gots am Ziistig morge am sächsi per Taxi zum Flughafe.

I freu mi fest. So fest wieni die Reis gnosse ha und das ganze wörkli due als Vorrecht aluege, freuimi doch glich weder mega uf deheime, uf alli liebe Lüt wo dete send, uf die vertrouti Umgäbig und ehrlech gseit ned emol zletzt weder ufen greglete Alltag.

Höt Obig chochemer no schwiizerisch, Rüeblisalot, Älplermaccrone und Öpfelwäie. Eigentlech hämmer eusi WG Gspändlis dezue iglade, aber womer hoet dRosmarie so druf agsproche händ, het sie ganz erstund gfrog: ah, denn choched er höt obe. =). so luegemer denn wär ume esch und susch gnüsse mer das halt eleige.

De Michi studiert näbe mer grad no mini Vorschläg vo wäge Seoul und was go aluege. Bi gspannt wie das werd. Freu mi emu mega druf!